BAUKAU, STLTIMORLESTE.com – Autoridade Protesaun Sivil (APC – sigla português) fasilita formasaun jestaun risku dezastre naturais nian ba estrutura Konselhu Munisipal Protesaun Sivil (KMPS) sira iha Munisipiu Baukau.
Xefe Departementu husi Sentru Formasaun ba Autoridade Protesaun Sivil, Adolfo da Costa hatete, tuir pedidu Autoridade Munisipiu Baukau hodi fasilita formasaun ba estrutura sira realiza durante loron 3, ho materia neebe aprezenta baziku kona-ba jestaun risku dezastre naturais nian neebe bele ajuda sira hodi servisu ho diak iha terenu, tanba impaktu husi re-estrutura difikulta dirijenti atual sira halo servisu ho diak.
“Materia baziku neebe aprezenta kona-ba jestaun redusaun risku dezastre naturais nian, buat lubuk ida neebe mak ita koalia kona-ba dezastre naturais neebe akontese, koalia liu kona-ba siklu molok durante no depois,” hateten Adolfo ba jornalista sira iha Salaun Apuramentu Baukau, Tersa (25/03/2025).
Nia sublina, liu husi formasaun nee sei ajuda estrutura sira iha Munisipiu Baukau atu halo prevensaun ba akontesimentu dezastre naturais nian tuir siklu neebe orienta katak, molok, durante no depois, tanba impaktu husi mudansa re-estrutura kuaze fo impaktu ba komunidade sira iha baze, tanba menus informasaun.
Nia fundamenta, liu husi formasaun refere bele ajuda estrutura sira iha nivel munisipiu hodi kontinua divulga informasaun ba komunidade sira hodi prevene aan husi risku dezastre naturais neebe bainhira akontese.
Diretor Servisu Diresaun Risku Dezastre Naturais, Clementino Pedro Barboza konsidera formasaun refere importante ba estrutura sira atu intende servisu tarefas neebe atribui ona, tanba impaktu husi mudansa re-estrutura difikulta servisu, tanba la intende tarefas servisu neebe iha.
“Hau hanoin anteriormente servisu lao hela, maibe formasaun nee atu mai aumenta no dezenvolve tan deit nunee servisu ho profesional liu tan, hau fiar liu husi formasaun nee, idak-idak bele hatene ona nia kompozisaun,” hateten Clementino.
Tuir Diretor nee katak, mezmu impaktu husi mudansa re-estrutura, maibe durante servisu Diresaun Risku Dezastre Naturais lao normal, tanba kontinua atende vitima dezastre naturais sira iha baze, maibe formasaun refere atu eleva liu tan konhesimentu estrutura Konselhu Munisipal Protesaun Sivil hodi atende servisu ho profisional.
Enkuantu Reprezentante Prezidente Autoridade Munisipiu Baukau, atual Sekretariu Munisipal Planeamentu Investimentu No Dezenvolvimentu, Eduardo Filipe Ximenes agradese ba apoiu tomak neebe bele kapasita ona estrutura KMPS iha Baukau hodi halo jestaun diak hodi hatan ba kestaun dezastre naturais.
“Kompetensia neebe atribui mai, so ba halo identifikasaun, monitorizasaun no fornese dadus, maibe atu apoiu material food no non food no rekuperasaun nee iha APC,” katak Eduardo.
Nia sublina, kona-ba hatan vitima sira iha area dezastre naturais nian, Governu fo ona kompetensia ba Autoridade Munisipiu sira, maibe limita, tanba bainhira iha komunidade afeta ba dezastre naturais, parte tekniku husi Autoridade Munisipiu neebe enkaixa iha KMPS bele identifika no monitoriza kondisaun iha terenu hodi rekolha dadus relata ba APC hodi fo apoiu emerjensia no material rekuperasaun.
Tanba nee ezistensia KMPS nuudar baze atu rekolha dadus hodi fornese, maibe kona-ba apoiu emerjensia no material rekuperasaun APC mak iha kompetensia atu responde.
Nunee husu estrutura KMPS atu foku materia formasaun neebe APC aprezenta hodi intende, atende ba komunidade sira neebe afeta dezastre naturais iha baze no relata dadus ba APC ho klaru.
(tom)
