DILI, STLTIMORLESTE.com – Hahu loron 18 too 25 fulan November 2024, Autoridade Protesaun Sivil (APC – sigla português) rejistu kazu dezastre naturais hamutuk 46 no laiha ema ida mate ba desastre nee.
“Kazu dezastre hamutuk 46, husi numeru nee anin sobu ita nia komunidade nia uma 5, ahi han uma 26, bee sae 15,” hatete Xefe Seksaun Relasaun Externa iha APC Nasionál, Nelson Nunes de Orleans ba jornalista sira, liu husi konferensia imprensa, Segunda (02/12/2024).
Nia dehan, komunidade nia uma hamutuk 15 neebe bee sae apoiu deit emerjensia 41, no numeru ema neebe afetadu 31 no nain 5 mak prienxe ona kriteria.
“Ita haree iha Munisipiu Ainaro ahi han ida, Munisipiu Atauro anin sobu uma 3, Munisipiu Dili ahi han uma 23, Fanfics Bobonaro anin sobu uma ida no bee sae iha 15, Munisipiu Manatuto anin sobu uma ida no ahi han uma rua,” nia esplika.
Nia informa, Komando APC Munisipiu ho parseiru relevante sira fornese asistensia emerjensia ba familia afeitadu sira neebe sai vitima ba dezastre naturais.
Iha fatin seluk, Reprezentante Prezidente Autoridade Munisipiu (PAM) Ainaro, Ruivo Barros Magno hatete, iha Munisipiu Ainaro akontese dezastre naturais iha postu 4, maibe hetan ona apoia emerjensia husi APC no Administrasaun Munisípiu Ainaro nian.
Nunee mos Vitima ba Dezastre Naturais, Olinda Moniz esplika, sira nia uma sobu iha semana kotuk maibe hetan ona apoiu emerjensia husi Governu.
(jen)
