DILI, STLTIMORLESTE.com – Hahu husi loron 22 too 28 fulan Abril tinan nee, iha rejiaun Timor Leste akontese tipu dezastre neebe Autoridade Protesaun Sivil (APC) rejistu uma neebe estragu hamutuk 61.
“Anin sobu ita nia komunidade nia uma hamutuk 38, rai halai 2, ahi han 2, bee sae 19, prienxe kriteriu 16 apoiu deit emerjensia 48 no ema neebe afeitadu 284,” hatete Xefe Relasaun Externa APC, Nelson Nunes de Orleans ba jornalista sira liu husi Konferensia Imprensa iha APC, Kaikoli, Dili, Segunda (28/04/2025).
Nia informa, liu iha munisípiu sira hanesan iha Munisípiu Likisa anin sobu uma 3, Munisípiu Manatuto anin sobu uma 32, nomos bee tama komunidade nia uma 19, rai halai 2 no ahi han uma 1, Munisípiu Manufahi anin sobu uma 1, RAEOA ahi han uma 1 no anin sobu uma 1, iha Munisípiu Vikeke anin sobu komunidade nian uma 1.
“Ita nia Komando APC Munisípiu sira hamutuk ho parseirus relevante fornese asistensia emerjensia ba familia afeitadu maka hanesan ai han no laos ai han,” nia informa.
Nia deklara, Komando Operasional Autoridade Protesaun Sivil (APC) iha Munisípiu sei kontinua halo hela levantamentu detalhus kona-ba sasan neebe estragus no lakon.
Iha fatin ketak, Vitima Ermelinda da Costa husi Munisípiu Lautem deklara, anin sobu nia uma durante semana ida ona, maibe seidauk hetan rekooperasaun husi Governu.
“Ami seidauk hetan rekooperasaun, maibe hetan ona apoiu emerjensia, mais iha ona informasaun husi Xefe Suku katak, ami hein semana ida nee ami bele simu ona sasan husi ita nia Governu,” nia afirma.
(jen)
