DILI, STLTIMORLESTE.com – Durante semana ida nia laran hahu husi loron 11 too loron 18 Novembru tinan nee, Autoridade Protesaun Sivil (APC) rejistu uma hamutuk 13 mak anin sobu.
“Durante semana ida nia laran, ita rejistu ema nain 59 neebe afeta ba dezastre no uma hamutuk 13,” hatete Xefe Seksaun Relasaun Externa, Nelson Nunes Oleans ba jornalista sira liu husi konferensia imprensa, neebe halao iha salaun APC Díli, Segunda (18/11/2024).
Nia dehan, husi numeru 13 nee anin sobu uma ida, ahi han uma 13, mate laiha, numeru ema neebe afetadu hamutuk 59, sira neebe prienxe kriteria nain 13 nomos hetan apoiu emerjensia ida.
“Ita haree iha RAEOA ahi han uma 12, Munisipiu Baukau anin sobu uma ida, Munisipiu Dili ahi han uma ida,” nia informa.
Nia esplika, Komando APC Munisipiu sira nomos parseiru relevante sira fornese asistensia ba familia afeitadu sira hanesan ai han no laos ai han.
Entretantu ha Munisipiu Baukau akontese anin boot halo ai monu estraga komunidade nia uma ida, Munisipiu Díli, Suku Vilaverdi nian ahi han komunidade nia uma ida no fo apoiu emerjensia.
Iha fatin hanesan, Xefe Suku Vila Verde, Abdul Mancoli Aranhado esplika, iha Munisipiu Díli, Suku Suku Vila Verde, Aldeia Terus Nain akontese duni ahi han komunidade nia uma ida, maibe hetan ona apoiu emerjensia husi APC.
“Ita nia familia uma kain ida mak ahi han nia uma, no daudaun nee sira hetan ona apoiu emerjensia husi ita nia governu liu husi APC, depois ita sei haree fila-fali karik dadus foti hotu atu apoiu tan saida tuir mai,” nia deklara.
(jac)
