DILI, STLTIMORLESTE.com – Hahu husi loron 24 Marsu too loron 4 Abril, aplikante hamutuk 17.124 aplika ona rekrutamentu bolsa kandidatu profesores ba nivel Ensinu Sekundariu Jeral no Tekniku Vokasional (tekvo).
Portavoz ME, Filipe Rodrigues Pereira dehan, bazeia ba dekretu lei 31/2023, 3 Maiu, Ministeriu Edukasaun refleta ninia kompromisu estratejiku hodi hasae kualidade ensinu iha Timor Leste, espesialmente iha area rekursu umanus iha nivel ensinu sira, Miniteriu Edukasaun kontinua halao teste BdC dos profesores iha nivel ESG no Tec-Voc bazeia ba Despacho Ministerial Nu. 10/2025, 21 Marsu hodi determina abertura Bolsa Kandidatus Dosenstes Ensinu Senkundariu Jeral, inklui area produtivu programa Tec-Voc.
“Hau atu aumeta deit kona-ba teste espesial ba profesor kontratu 2023, ME fo mak des pontus ba sira,.nee hanesan kriteria ida, tanba sira nian dedikasaun no esperiensia, nomos sira kontratadus ho Ministeriu 2023,” dehan Filipe ba jornalista sira liu husi konferensia imprensa iha sala VIP ME, Sesta nee (04/04/2025).
Nia hatutan, tuir aplikasaun teste BdC profesores ba nivel Ensinu Sekundariu Jeral no Tekniku Vokasional neebe hahu iha 24 Marsu too 4 Abril 2025, ho progresu hanesan progresu aplikasaun BdC profesores ba nivel ESG-Tec-Voc, aplikantes neebe Aplika Liu husi online 11.411 no manual 4.765, profesores ho moras prolongada 254, inklui eis profesores kontratadus 2023 hamutuk 694 Konkore ona vaga bolsa kandidatu professores iha ME.
Iha fatin hanesan, Diretor Nasional Rekursu Umanu ME, João Amaral hatete, vaga nee ba ensinu sekundariu no sei haree por etapa, tanba nee eis professor sira mos sei tuir teste tuir sistematis KFP.
“Hau responde kedas kona-ba eis profesores 2023 sira, laos ohin taka ona lae, tuir kalendariu neebe mak ami fo sai hahu husi 24 Marsu too 7 Abril sei taka iha loraik, ami mos sei haree, karik iha posibilidade loke tan pasu loron rua too haat, nee ba Dili, maibe ba munisipiu ami sei taka iha loron 7 loraik,” tenik nia.
Nunee mos Deolindo da Cruz nuudar Diretor Jeral Ensinu Sekundariu Jeral no Ensinu Tekniku Vokasional dehan, numeru lugares ba Ensinu Sekundariu Jeral no Tekvo, tuir mapa kuadru pesoal loke lugares nee hamutuk 1450, nee fahe ba disiplina hanesan português 250, tetun 105, inglês 125, melayu 75, istoria geografia 150, ekonomi 100, matematika 100, fizika 125, biolojia 100, multimedia 125, civika 100, relijiaun 75.
(jac)
