DILI, STLTIMORLESTE.com – Hahu husi loron 19 Maiu too horiseik, aplikantes bolsa kandidatu profesores ba Ensinu Sekundariu no Tekniku Vokasional (Tekvo) hamutuk 3,609 mak partisipa ona teste, husi numeru nee 218 mak kualifikadu ho valor 60 ba leten.
“hahu husi loron 19 Maiu too mai loron 28 nee, total partisipantes 3,609 mak halo ona teste, husi 3,609 nee hetan klasifikadu nee foin hetan 218 ho valor 60 ba leten, nee ba iha kada materia hanesan português, inglês, tetum, melayu, istoria, geografi, ekonomia. Kada loron ida iha turnu tolu, turnu ida 190, ne hahu husi dader too loraik, nee ita iha turnu tolu nee 500 por dia,” dehan Diretor Nasional Rekursu Umanu iha Ministeriu Edukasaun, João Amaral ba jornalista STL iha nia knaar fatin Vila Verde, Kinta nee (29/05/2025).
João dehan, ida seidauk teste nee provizoriu, tanba sira publika nee rihun 10 resin, entaun falta rihun 7 resin mak seidauk halo teste, teste nee parte husi prezidente juri, ekipa juri nomos tekniku apoiu juri, sira mak sei halo kontrolu ba iha teste ida nee, teste nee sei remata iha loron 17 fulan Junhu tinan nee.
“Ita aumenta tan loron ida,.tanba sira ida uluk reklama nee, kona-ba eis profesores kontratu 2023 nee, sira sei halo teste espesiál ida iha loron 16 fulan Junhu, loron ida espesiál ba sira halo teste, sira hamutuk 7,025,” dehan nia.
Nunee mos Paulo de Jesus Magno hanesan aplikantes, eis manorin kontratu 2023 dehan, aat liu teste ida nee vaga ba bolsu kandidatu, kuandu liu sai fali kandidatu profesor, afinal tinan barak ona sai ona profesor.
“Ami bele tuir teste, bele mos la tuir teste, tanba foin hatama deit dukumentu balu esklui no balu kategoria la liu, teste ida nee laos valoriza ami ou solusaun ba ami nia problema, teste ida nee ME nia planu, ami labele halo tan protestu ou asaun. Pesoal hau bele tuir teste, maibe ami presiza tur hamotuk,” dehan nia.
(jac)
