DILI, STLTIMORLESTE.com – Familia liu-liu inan aman neebe ninia oan ho kondisaun defisiensia nafatin fo apoiu oan, hodi asesu ba iha edukasaun formal.
Haktuir Odete Nunes da Costa Marques hanesan inan neebe oan defisiensia hatete, ninia oan agora daudaun remata ona estudu nivel sekundariu hodi haruka nia kontinua ba iha ensinu superior, maibe sei haree ba orsamentu no agora daudaun lori nia atu ba tuir kursu lian englesh no komputador, tanba edukasaun non formal mos importante tebes, nee duni nuudar inan aman sempre fo apoiu tomak ba oan nia estudu, maske oan ho kondisaun defisiensia, labele lakon oportunidade hanesan ho ninia maluk sira seluk.
“Hau nian oan nee desde ho idade tinan lima, hau lori nia ba eskola TK, tanba ita inan aman nian responsabilidade mak ita nian oan sira tenke asesu hotu edukasaun, tanba nee lalika haree ba oan nian kondisaun, maibe motiva nafatin nunee hau nian oan mos tenke hetan edukasaun hanesan ho ninia maluk sira, hau agradese tanba agora hau nia oan remata ona ninia estudu iha tinan kotuk,” dehan Odete ba STL iha Vila Verde, Segunda nee (09/02/2026).
Odete akresenta, ninia oan hamutuk nain haat, ida ho kondisaun defisiensia nee oan ba dala tolu, nee duni inan aman neebe sira nian oan defisiensia, bainhira sira nian idade too ona atu eskola, tenke lori sira ba, tanba nee sira nian direitu atu asesu ba iha edukasaun, labele husik sira iha uma deit, nee labele, maibe presiza lori sira ba eskola.
“Hau sempre fo hanoin ba hau nia oan katak, maske ho kondisaun defisiensia maibe labele lakon vontade atu aprende, ninia dalan mak tenke esforsu aan estuda no agora hau haruka nia atu asesu ba edukasaun non formal no tinan oin hau sei suporta ninia estudu ba too iha universidade,” dehan nia.
Entretantu Juliana Nunes da Costa hanesan defisiensia dehan, maske ho kondisaun defisiensia maibe agradese tanba ho inan aman no familia hotu nian apoiu bele remata ona estudu nivel sekundariu iha tinan kotuk no agora atu aprende tan lingua english no komputador, nafatin iha vontade neebe diak atu aprende.
“Maske hau ho kondisaun defisiensia maibe agradese tanba ho inan aman no familia hotu nian apoiu bele remata ona estudu nivel sekundariu iha tinan kotuk no agora hau atu aprende tan lian english no komputador, nafatin iha vontade neebe diak atu aprende,” nia afirma.
(jac)
