DILI, STLTIMORLESTE.com – Ohin prosesu ensinu aprendizajen ba estudantes iha Eskola Sekundariu Jeral FINANTIL paradu, tanba kauza husi inundasaun tama too sala de aula inklui areador eskola, no husi Ministeriu Edukasaun (ME) tun direita ba eskola sekundariu rua neebe afeta ba inundasaun.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha ESJ FINANTIL Aimutin, Segunda nee (23/02/2026).
“Ita nian ensinu sekundariu jeral iha Dili laran nee iha rua mak afeita ba iha inundasaun neebe mak akontese horiseik loraik, eskola rua nee mak hanesan eskola Sekundariu FINANTIL no Eskola Sekundariu nu. 4 Setembru, maibe ESJ nu. 4 Setembru bee nee hasai hotu ona, nee duni estudantes sira partisipa aprendizajen lao hanesan baibain, agora eskola FINANTIL mak ohin prosesu aprendizajen paradu, tanba ita boot sira haree bee nakonu iha areador eskola inklui iha sala aprendizajen,” tenik nia.
Benjamin hatutan, ESJ nu. 4 Setembru ohin ninia prosesu aprendizajen lao normal, tanba husi eskola FINANTIL nian ohin sei haree bee neebe nakonu, bainhira normaliza ona mak aban ou bainrua ensinu aprendizajen bele lao normal, maibe ohin loron paradu.
(jac)
