DILI, STLTIMORLESTE.com – Relasiona ho parte hirak neebe lei fo dalan atu aprezenta rikusoin ba Komisaun Anti Korrupsaun (KAK) tarde, husi parte KAK nian aplika ona koima ba sira.
Diretor Jeral Prevensaun no Sensibilizasaun KAK, Antonino Alves ba Cruz dehan, infrator sira neebe hetan aplikasaun koima ho valor korespondensia 25% husi salariu baze mensal neebe haktuir ba artigu 48 kona-ba aprezentasaun tarde, KAK konsege rekolha valor koima ho montante pur volta US$ 75.612,42, neebe mak agora daudaun iha hela konta temporariu KAK nian iha Banku BNCTL.
“Iha tinan ida nee KAK aplika ona koima ba ema 439 neebe aprezentasaun tarde, tuir artigu 48 husi lei numeru 7/2020 katak, kuandu aprezenta nia rikusoin tarde ita sei aplika 25% ba sira,” dehan Antonino ba jornalista sira iha Matadoru, Dili, Kuarta (15/01/2025).
Nia hatutan, tuir sistema rejista ona instituisaun hamutuk 120, no iha ema nain 439 neebe aplika koima ba, mai husi Instituisaun 40.
Tanba aplika koima no osan nee agora daudaun iha hela taxa temporariu KAK nian pur volta montante US$ 75.612,42, maibe seidauk hotu no ida nee ba sira neebe aplikasaun koima, no balu sei iha hela prosesu seidauk konklui.
No oras nee daudaun tama iha tipu anualidade, katak iha loron ida fulan Janeiru too iha loron 31 fulan Janeiru, ba kargu sira neebe rejista tiha ona atu atualiza fali sira nia bens no interese, kuandu liu ona loron 31 fulan Janeiru, no iha loron 1 fulan Fevereru ba leten kontinua aplika koima ba sira.
Iha fatin ketak, Komisariu KAK, Rui Pereira dehan, iha KAK aplika ona koima ba funsionariu balu.
“Komisariu sira aplika koima 25% no ema balu protesta ami dehan lei mak hanesan nee, KAK implementa deit lei no reklamasaun mos lei fo dalan, se reklamasaun iha konsidera,” dehan Komisariu KAK, Rui.
Nia hatutan, reklamasaun neebe mai la too 20, no oras nee daudaun ekipa sosializa hela kona-ba deklarasaun nian, liu-liu kona-ba duransaun tempu atu sira mai deklara.
(ter)
