DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JPJ, SM, HPM, tanba komete krime Danu Agravadu hasoru ofendidu MC.
Tuir akuzasaun neebe Juiz prosesu Afonso Carmona lee sai loron Segunda ( 25/11/2024) katak, iha loron 11 Junhu 2023, ofendidu MC ba kuu kafe, maibe nia rian JM hase nia hodi dehan, kuu kafe husu lai, ofendidu hatan dehan iha rai neebe mak kafe nain kuu kafe sei husu fali.
Iha loron 12 Junhu tinan 2023, por volta 14h00, arguidu sira ba kuu ofendidu MC nia kafe, tanba nee mak sira diskuti malu ho ofendidu nia alin DM ho nia oan mane NM.
Arguidu sira la simu, tanba rai nee sira mak entrega ba iha ofendidu nia aman hodi kuda kafe, tanba nee sira lori katana ba tesi kafe hun lima nulu resin, banhira fan karik bele hetan osan ho montante US$ 20.000,00.
Motivasaun husi arguidu sira ba ta estragus ofendidu nia kafe hun lima nulu resin, tanba sira hakarak foti fali rai ka banhira ofendidu sira atu kuuk karik tenke entrega fahi ida ba iha arguidu sira.
Konsekuensia husi arguidu sira nia asaun nee, halo estragus ofendidu nia kafe no lakon rendimentu durante tinan naruk, tanba konsekuensia husi tesi kafe.
Tanba nee, Ministeriu Publiku akuza arguidu sira komete krime Danu Agravadu, neebe previstu iha artigu 259 husi Kodigu Penal.
Hatan ba akuzasaun nee, arguidu nain tolu konfesa imparsial ba faktus katak, arguidu sira mak tesi duni kafe refere, tanba kafe nee pertense ba arguidu sira nian, no mos rai neebe kuda kafe ba.
Arguidu JPJ deklara, ofendidu uluk asumi kargu hanesan Xefi Suku, ofendidu la kuu kafe ida, arguidu hamutuk ho nia oan sira mak kuu kafe, tanba rai neebe kuda kafe ba arguidu sira nian.
Arguidu deklara, sira nervozu hodi tesi kafe refere, tanba ofendiu koalia aat arguidu sira, no ofendidu dehan rai neebe kuda kafe no kafe neebe iha ona ofendidu nian.
Arguidu deklara tan, kona-ba tesi kafe laos los mak hun 30 resin laos 50 resin.
Ofendidu haforsa tan akuzasaun katak, rai neebe kuda kafe ofendidu nian, laos arguidu sira nian ida.
Rona tiha deklarasaun sira nee, Tribunal husu ba iha Prokurador hodi tama ba iha alegasaun. Iha alegasaun nee, Prokurador Renato Bere Nahac mantein ho akuzasaun neebe iha, husu Tribunal atu kodena arguidu sira ba periodu suspensaun, no selu hikas kafe neebe tesi ona tuir osan neebe ofendidu husu.
Enkuantu husi parte defeza arguidu nian husu Tribunal tetu sirkunstansia hotu, no aplika pena neebe kmaan ba arguidu.
Rona tiha deklarasaun nee, Tribunal adia ba loron seluk hodi rona desizaun.
(ter)
