DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial DdJA, tanba komete krimi Arma Branka.
Tuir faktus neebe iha katak, testemunha Jose Antonio Barreto da Silva, Jorgino Espirito Santo depoimenta katak, iha dia 24/5/2020, tuku 23:40 ekipa patrulhamentu Dom Aleixo simu informasaun husi Delta Base katak akontese problema asaltu malu iha armajen loja Globus nia oin, Aldeia São Jose, Suku Bairo Pite.
Simu tiha informasaun refere, testemunha sira ho ninia kolegas hamutuk nain 7 dezłoka kedas ba iha lokal akontesimentu hodi halo atuasaun, maibe too iha neeba, eletrisidade mate kedas.
Mezmu nunee sira haree arguidu DdJA kaer katana maubeka ida no JdCGC kaer stick mola silu nian ida halai sai husi bairru laran ba iha dalan kiik (gang) ida iha armajen loja Globus nia oin, nunee testemunia ho nia membru ajente sira nain 7 kaer kedas arguidu nain rua (2) iha flagrante delitu.
Halo tiha inkeritu ba testemunia sira no arguidu nain rua iha kazu ida nee haree katak, arguidu DdJA lori duni katana maubeka ida iha fatin akontesimentu nunee, polisia patrulhamentu kaer kedas nia iha flagrante delitu tanba lori armas brankas neebe maka defini no proibe iha artigu 2º no artigu 20°, husi Lei numeru 5/2017, 19 Abril.
Arguidu DdJA pratika aktus nee ho forma neebe livre, deliberada no ho konsientemente, hatene katak halo rai, lori no uza arma brankas neebe lei bandu tiha ona maibe nia halo, rai, lori no uza iha iha mumentu problema mosu iha sira nia bairro laran hodi halo ema tauk, trauma no paniku sosial.
Hatene mos katak, lei defini ona tipu armas brankas no proibe tiha ona nunee bainhira se maka halo, rai, lori ka uza armas brankas nee sei hetan kastigu penal.
Tanba nee, konstitui arguidu DdJA nudar autor Material, ho forma konsumadu hodi pratika krime, halo, lori no uza armas brankas neebe previstu no punidu tuir artigus 2º no artigu 20° husi Lei n. 5/2017, 19 Abril.
Hatan ba akuzasaun neebe iha katak, arguidu konfesa imparsial ba faktus no arguidu esplika katak, momentu neeba entre grupu rua mak tuda malu, maibe grupu rua nee mai husi neebe arguidu la hatene tanba sira tuda malu ahi eletrisidade mos mate.
Arguidu deklara, momentu neeba arguidu nia feen haruka arguidu tesi ai maran, tanba nee arguidu kaer katana sai husi uma laran Polisia mos too kaer arguidu tanba arguidu kaer hela katana.
Rona tiha arguidu Tribunal husu Ministeriu Publiku atu tama ba nia aelgasaun la presiza rona tan sasin, tanba arguidu konfesa sem dezerma ba faktus.
Iha alegasaun Ministeriu Publiku reprezenta husi Prokurador, Bartolomeo de Araujo, husu ba Tribunal atu fo pena minimu no suspensaun ba arguidu.
Entertantu parte Defeza husu ba Tribunal atu fo justisia neebe justu ba arguidu.
Rona tiha parte rua Tribunal adia ba loron seluk atu rona desizaun.
Prosesu nee prezide husi Juiz koletivu Jose Escurial, Fransisca Cabral Juiz estajiadu Manegas Nico Crisanto, Ministeriu Publiku reprezenta husi Prokurador, Bartolomeo de Araújo, no arguidu hetan assistensia husi Defensor Publiku Estajiadu, Mateus Pinto Guterres.
Jornalista: Terezinha De Deus
Editora: Carme Ximenes
