DILI, STLTIMORLESTE.com – Ohin Arkedioseze Dili Selebra Solenidade São Jose, Santa Maria nia kaben nomos selebra IX Aniversariu Ordenasaun Episcopal Dom Virgilio Cardeal do Carmo da Silva, SDB Arsebispu Metropolitana Dili.
“Ohin ita selebra São Jose nian, ida nee mak ita hotu nia ksolok ba dader nee, halibur ita hotu hamutuk hodi hasae ita nia agradesimentu ba Maromak, tan loron ida nee importante laos deit ba Arkedioseze Dili, liu-liu ba kreda Timor, kreda universal ba ita Arkedioseze Dili nian, iha sentidu ruma neebe partikular, ita dehan festa São Jose nia, momentu mai ita hasae ita nia agradese ba Maromak, iha sentidu gratidaun, maske idak-idak moris nuudar sarani, nuudar bispu, amululik, madre, padre, inan aman, dala barak ita hamriik monu,” hatete Dom Virgilio Cardeal do Carmo da Silva, SDB liu husi nia omilia wainhira prezide misa iha Igreja Katedral Dili, Kuarta nee (19/03/2025).
Maibe Maromak nunka kolen, Maromak nunka baruk, kontinua hasulin ninia grasa mai ita idak-idak, nee duni ohin sai momentu ida ita atu agradese no fo obrigadu ba Maromak, nuudar povu nuudar sarani, sinal saida mak ita bele halo atu agradese ba Maromak nia laran diak rohan laek.
Dom Virgilo hatete, nuudar konvite ida ema hotu fila fali atu ita hamutuk hatudu iha ita nia refleksaun dader ida nee figura Sao Jose ninian, hatun iha sentru refleksaun figurasaun São Jose nian, tanba laos mai harohan husu tulun, maibe liu husi nia hahalok, ezemplu ita mos koko banati tuir nia ezemplu ruma iha idak-idak nia moris, nee duni fila fali ba São Jose ita hotu konhese nia se mak São Jose.
Maske São Jose Jesus nia aman hakiak deit, maibe ninia papel ida neebe responsavel iha Jesus nia moris, papel neebe labele haketak nia ho Jesus.
“Ita hotu hatene katak liafuan Maromak halo aan ba ema sempre simu liafuan ida nee, no liafuan nee halo ba ema nee akontese, se nia familia laos iha São Jose no Maria simu Jose no Maria nia familia,” hatete Dom Virgilio.
Maibe hanoin São Jose nia previleiju tau matan ba liafuan neebe halo aan ba ema, ita imajina saida mak mosu ba nia, halao nia knaar ida nee wainhira Virjen Santa Maria iha Belem neeba buka fatin ida atu Nain Feto bele tur fatin neebe dignu, imajina mos Nain Feto tenke husik hela Nazare halai ba Ezipto hela iha neeba iha difikuldade susar oin-oin.
Dom Virgilio hatete, iha nee Virjen Santa Maria depozita ninia konfiansa tomak iha São Jose nia liman, koopera didiak ho São Jose wainhira realizasaun misteriu boot nee, São Jose tau matan ba familia Nazare modelu aman neebe hatene tau matan ho domin wainhira iha familia.
Modelu aman neebe hatene observa, haree oinsa sai aman neebe diak aman neebe los, laran moos ba nia kaben.
Dioseze Dili iha igreja universal, fulan Marsu nee Santo Padre husu ita atu reza ba familia neebe iha krize, Dili nian dehan reza ba partikular aman sira familia ninian, nunee mos ba sira neebe prepara aan atu sai aman.
Tanba knaar nee importante, knaar neebe iha responsabilidade boot, tan nee São Jose hatudu aman neebe laran moos, aman neebe hadomi lia los laos moos deit, maibe laran moos no hadomi lia los hatene hatur lia los, uluk nanain iha nia fuan, mak nia bele guia ninia oan no familia lao iha dalan los no laran moos ninian, ida nee mak São Jose hamutuk ho nia kaben Santa Maria servisu halo planu hamutuk iha ksolok, sira haksolok hamutuk, iha terus sira mos terus hamutuk, nee São Jose no Nain Feto bele dehan kooperadores primeiru no prinsipal iha misteriu de redensaun.
“Ohin ita hanoin São Jose, São Jose neebe riku tebes-tebes virtude oin-oin ita reza ita mos bele banati tuir ezemplu São Jose nian, oinsa ema idak-idak bele aprende husi São Jose atu festa ida nee ba sarani hotu neebe domin boot São Jose saida mak presiza aprende,” hatete Dom Virgilio.
(joa)
