DILI, STLTIMORLESTE.com – Relasiona ho deputadu sira iha Parlamentu Nasional (PN) atu sosa kareta, estudante sira la aseita no planu sei halo manifestasaun, Jurista konsidera lei fo dalan atu halo manifestasaun, tanba hanesan kontrola sosial.
“Saida mak estudante sira halo nee faz parte husi kontrolu sosial, direitu nee garantidu iha artigu 42 numeru 1 husi Konstituisaun RDTL no la presiza husu autorizasaun husi polisia, nuudar instituisaun neebe toma konta iha seguransa publika, polisia iha obrigasaun para asegura manifestasaun nee lao ho pasifiku,” dehan Jurista Sergio Dias Quintas ba jornalista STL iha Kaikoli, Sesta (12/09/2025).
Nia deham, iha lei numeru 1/2006 artigu 11 polisia iha obrigasaun hodi assegura ordem publiku.
“La lojiku liu bainhira polisia autoriza estudante sira halo fali manifestasaun iha Tasi-Tolu, no manifestasaun nee meiu ida atu ema hatoo aspirasaun hodi ema bele rona, liu-liu deputadu sira hodi rona,” nia sublina.
Nia argumenta, manifestasaun nee efetivu mak tenke halo iha sede PN nia oin para deputadu sira rona ho sira nia tilun rasik saida mak populasaun nia hakarak, tanba sira tur iha PN reprezenta povu.
Tanba nee, laos halo fali iha Tasi-Tolu neebe laiha sentidu, tuir lo-loos sira halo iha PN distansia nee kabe ba kompentensia Polisia para hare no implementa tuir lei.
Informa tan, iha Timor Leste ohin loron ema balu la sensitivu ba problema sosial iha rai laran, liu-liu deputadu sira neebe ho sira nia arogansia hakarak manten sosa kareta foun ba sira, maibe sira ignora tiha injustisa neebe populasaun kiik sira enfrenta liu-liu ba sira neebe sente no sofre diretamente ba despezu neebe governu halo ba ema sira nee.
Nunee iha artigu 42 koalia kona-ba liberdade reuniaun no manifestasaun nian, iha numeru ida hateten katak, iha garantia liberdade ba ema hotu-hotu neebe hakarak halo reuniaun iha pas no la kaer kroat, no sira lalika husu uluk autorizasaun. Segundu rekonhese ema hotu-hotu nia direitu ba manifestasaun tuir lei haruka.
Iha fatin ketak, Akademiku UNTL, Rafael de Jesus dehan, saida mak ukun nain sira halo la tuir nia dalan, estudante sira tenke kritika.
“Saida mak deputadu sira halo la tuir nia dalan hodi benefisia ba sira nia aan deit, publiku labele nonok tenke kritika,”dehan nia.
Nia fundamentn, tuir lo-loos deputadu sira tenke hanoin didiak molok foti desizaun ida atu sosa kareta.
Jornalista: Terezinha De Deus
Editora: Xisto Mendonça
