DILI, STLTIMORLESTE.com – Artista Indonezia Nadia Vega kontente vizita Palasiu Prezidensial hodi hasoru malu ho Prezidente Republika Jose Ramos Horta, halo diskusaun oinsa promove kampanha Turizmu.
Iha loron Kinta lokraik (05/06/2025) Artista Indonezia Nadia Vega vizita Palasiu Prezidensial no hasoru malu ho Prezidente Republika Jose Ramos Horta halo entrevista badak ho Xefe Estatu, atu promove kampanha turizmu ida neebe ho objetivu atu introdus liu tan Díli ba publiku iha Indonezia.
Nia reprezenta media Indonezia nian no hakarak hametin ligasaun entre Indonezia no Timor Leste, hodi destaka fahe sira nia istoria ba malu no enkoraja atu aumenta liu tan setor turizmu nian.
Remata entrevista ho Prezidente Republika, Nadia Vega diretamete vizita mos salaun ASEAN iha Palasiu Prezidensial. Halo reportajen espesial (SILET) iha Programa Televizaun SCTV nian. Nia Kontente haree Timor Leste nią preparasaun ba ASEAN no fo benvindu ba Timor Leste hodi sai Membru Permanente iha fulan Outubru 2025 mai.
Iha biban nee Nadia hatete, nia kontente mai Timor Leste no fo kontribuisaun ba festival Tasi Fest. “Hau hakarak kontribui no promove kampanha turizmu kruzadu ida entre Timor Leste no Indonezia, foka introdus Dili ba turista Indonezia sira enkuantu hatudu mos atrasaun Indonezia nian ba sira neebe iha Dili,” hateten Nadia Vega.
Nadia Vega neebe mak famozu iha Indonezia, hamutuk ho Artista sira seluk mai iha Timor Leste hodi atua iha Tasi Fest 2025 iha Dili, entre loron 5 too 7 fulan Junhu, hodi fo kontribuisaun ba promosaun kultura, edukasaun ambiental no kolaborasaun internasional, liu husi performansa muzikal no projetu sosial neebe fo impaktu pozitivu ba komunidade sira.
Nia sublina katak, Timor Leste no Indonezia iha ligasaun istoriku neebe metin, tanba nee nia espresa ninia interese iha atividade sira hanesan nee hodi atrai vizitante Indonezia barak liu tan, liu-liu bele mai haree biodiversiade oin-oin neebe uniku no furak iha Tasi okos ilha Timor nian.
(eme)
