BAUKAU, STLTIMORLESTE.com – Iha loron 29 Setembru 2025, tuku 19:30 OTL, mosu asaltu malu entre joven sira iha area Mulia Uaiaka, Postu Administrativu Kelikai, Munisipiu Baukau, rezulta uma komunidade 4 rahun, tanba hetan tuda husi joven sira.
Rezidente Mulia Uaiaka atual Xefe Suku Uaitame Celestino Morreira informa, asaltu malu nee nia parte seidauk hatene motivu lo-loos, tanba nia parte toba dukur iha momentu asaltu malu, maibe iha asaltu malu refere involve husi joven sira liu husi asaun tuda malu hodi rezulta uma hela fatin komunidade nian hamutuk 4 hetan estragus, tanba tuda husi konfrontador sira.
“Uma sira nee tuda balun iha odamatan, kalen, vidru janela kios kapela mos sira tuda, maibe uma hela fatin komunidade nian 4 mak rahun, asaltu malu nee arte marsiais hotu, maibe kalan neebe ita seidauk hatene nee Mulia oan ga mai husi neebe ita seidauk hatene,” Celestino Morreira konta liu husi telefone, Tersa (30/09/2025).
Xefe Suku nee deskonfia motivu ba asaltu malu refere dala ruma kauza husi loron hirak liu ba, tanba iha loron hirak liu ba joven ida husi Suku Tekinomata, Postu Administrativu Laga tesi fuuk iha Barber Shop Mulia, maibe joven refere hetan baku iha fatin tesi fuk, nunee iha loron 29 Setembru parte kalan mosu asaltu malu hahu husi area refere.
Tanba asaun nee la rezulta ema kanek no seluk tan, tanba bainhira asaun tuda malu mosu komunidade sira tauk idak-idak iha nia rezidensia, maibe uma hela fatin mak balu hetan estragus, nunee bainhira asaun refere mosu hafoin nia parte hader hodi kontaktu direita ba parte Komando Polisia Munisipiu Baukau hamutuk ho FALINTIL-Forsa Defeza Timor Leste too fatin hodi neutraliza situasaun.
“Kalan nee ita nia seguransa munisipiu mos mai ho forsa mos mai dala ruma kaptura jovem balun,” Katak Celestino.
Lideransa komunitariu nee argumentu, mezmu liu husi atuasaun Komando Polisia Munisipiu Baukau nian ba kazu refere kaptura ona joven balu, maibe posibilidade 30 Setembru 2025 (orsida kalan) sei asaltu malu hikas, tanba iha isu balu.
Nunee husu Komando Polisia Munisipiu Baukau atu destaka membru iha area Mulia hodi fo seguransa ba komunidade sira, tanba asaun asaltu malu refere deskonfia envolve husi eis membru arte marsiais sira.
Jornalista: Tomas Reis
Editora: Carme Ximenes
