DILI, STLTIMORLESTE.com – British Council – ASEAN UK SAGE halo vizita kortezia ba Ministeriu Edukasaun (ME), hodi koalia pilar tolu neebe apoiu ba iha Ministeriu refere.
Kestaun nee hatoo husi Ministra Edukasaun (ME), Dulce de Jesus Soares ba jornalista sira iha sala VIP ME Vila Verde, Segunda nee (04/11/2024).
“Ohin konselhu titanika sira neebe mak hola parte iha organizasaun ME sudeste Aziatiku, sira hakarak fo apoiu ba ME TL liu husi programa pilar tolu, ida mak literasia ho numerasia, liu-liu ba estudantes sira iha nível ensinu primaria no ensinu baziku, pilar segundu kona-ba asesu ba labarik feto sira neebe karik sira para eskola, la kontinua sira nian estudus, tanba ho razaun barak hodi la kontinua sira nian estudu. Iha programa ida nee bele haree ba assuntu ida nee,” dehan nia.
Nia hatutan, pilar terseiru mak labarik feto sira ou joven sira inklui joven feto ho mane neebe mak hodi asesu ba edukasaun, tanba sira menus iha area dijitalizasaun, tanba iha sira nian estudu sira haree katak, iha programa ida nee sei haree ba iha assuntu ida nee, pilar 3 nee laos deit ba estudantes primaria no baziku deit, maibe sei haree ba iha joven sira hotu.
Nia dehan, servisu ida nee halo tiha ona iha nasaun Kambodia, Laos ho TL, entaun nasaun tolu nee mak atu estuda hamutuk oinsa mak bele aplika didiak maneira sira neebe atu bele ajuda reforsa liu tan estudante sira nian prosesu aprendizajen.
Iha fatin hanesan, Deputy Diretor Programme and Devoploment, John Arnold Siena hatete, obrigadu ba tempu neebe ohin bele hasoru malu ho Ministra Edukasaun, atu diskuti kona-ba programa UK SAGE neebe mak iha, maibe ohin iha diskusaun neebe mak diak tebes-tebes ba iha programa tolu neebe mak atu fo apoiu ba ME TL.
(jac)
