DILI, STLTIMORLESTE.com – Eskola Baziku Central (EBC) Manleuana asegura livru iha biblioteka ho diak, hodi fo empresta ba estudantes lori ba uma.
Liafuan nee hatoo husi Diretur EBC Manleuana, Carlos Correia ba jornalista STL iha nia knaar fatin Manleuana, Tersa (18/11/2025).
“Ami nian biblioteka iha no livru hirak nee ami asegura diak liu tan iha biblioteka. Ita nian estudantes sira foti livru hakerek naran lori ba uma, depois sira lori mai fali eskola, nee semana ida, se lae ita nian estudantes sira lori livru nee ba estuda iha sala laran deit,” katak nia.
Carlos dehan, fo empresta livru ba estudantes lori ba uma too semana ida sira lori mai entrega fali, sira nian livru ba disiplina hotu kompletu no sira asegura diak livrus hirak nee iha biblioteka neebe mak iha ona.
Iha parte seluk, fisiais biblioteka iha Eskola Sekundariu Jeral FINANTIL, Adilson Viegas Esperito Santos dehan, kuandu livru sira nee estudantes sira impresta loron tolu sira impresta livru Ida, maibe loron tolu sira tenke entrega fali livrus nee mai iha eskola. Fatin nee maka ladun sufisiente ba estudantes sira, tanba kada loron atende estudantes tolu nolu nunee, nee presiza espasu neebe luan, para estudantes sira bele bok aan diak.
Nia hatutan, biblioteka nee haree ba iha fatin neebe mak klot liu, sira mos presiza fatin neebe mak sufisiente, sira presiza hetan ajuda husi parte edukasaun nian hodi bele haree sira nian fatin biblioteka ninia.
Jornalista: Jacinta Sequeira
Editora: Domingas Gomes
