DILI, STLTIMORLESTE.com – Sidadaun hotu sei halo viajen ba idak-idak nia knua, hodi selebra loron matebian hamutuk ho familia, tanba nee presiza viajen ho kalma no haree kondisaun transporte, atu nunee bele asegura viajen too iha fatin.
Lia menon nee hatoo husi Deputada Bankada CNRT, Cedelizia Faria katak, daudaun nee akompanha dezastre barak, tanba nee husu bá sidadaun sira atu lao ho kuidadu.
“Agora ita tama bá selebra loron matebian, no sidadaun sira idak-idak sei fila ba nia knua, atu nunee selebra loron matebian, i ami husu ba sidadaun hotu molok atu lao haree lai kondisaun transporte, atu nunee asegura viajen ho diak”, katak Deputada Cedelizia Faria ba STL, Kuarta (30/10/2024), iha PN.
Nia dehan, bá sidadaun sira neebe konduz transporte bainhira atu halo viajen presiza deskansa ho diak, antes viajen haree didiak kondisaun karreta no motor, tantu karreta publiku no privadu, atu haree kondisaun neebé estavel, nunee asegura viajen ho diak i too iha idak-idak nia fatin.
Nia nafatin apelu ba sidadaun hotu atu halai transporte mos ho kalma, tanba iha viajen nee tula mos familia sira, tanba nee labele lanu hodi labele hetan dezastre.
(gui)
