BAUKAU, STLTIMORLESTE.com – Sidadaun nain 1 mate no nain 1 kanek grave hafoin monu sai husi kareta trek ida iha area Larifanu, Suku Libagua, Postu Administrativu Laga, Munisipiu Baukau.
Komadante Komando Polisia Munisipiu Baukau, Superintendente João Sancho Pires esplika, iha loron 13 Julhu tinan nee, pur volta tuku 02:00 loraik, kareta baskolante ida ho sapa matrikula 58.783 neebe konduz husi JDCX tula pasajeiru nain 5 kompostu mane nain 3 no feto nain 2 husi diresaun Suku Libagua ba Boleha Suku Soba atu tuir serimonia kultural balun, maibe kareta refere too iha area Larifanu halai ho velosidade rezulta pasajeiru feto nain 2 ho identidade Floriana Xavier da Silva idade 31 no Flora idade 17 monu sai husi kareta, tanba tuur iha kapon kareta leten.
“Trek nee tula ema nain 5, mane nain 3 iha laran, feto nain 2 tuur iha kapon leten depois kareta nee lansadu too ikus alin feto nain rua nee monu, sira kontaktu kedas ambulansia foti kedas vitima nain 2 nee too dalan klaran ida seluk iis kotu, nain 2 mai too HoREX ida seluk ba mortuariu ida seluk sei lao nafatin,” hateten João Sancho Pires ba jornalista sira iha Vila Nova Baukau, Segunda (14/07/2025).
Nia sublina, hafoin akontese parte Polisia Eskuadra Laga no Ambulansia simu kontaktu too kedas fatin akontesimentu hodi evakua vitima nain rua ba Hospital Rejional Eduardo Ximenes (HoREX) Baukau atu halo tratamentu, maibe vitima ho naran Floriana Xavier da Silva, idade 31 hakotu iis iha dalan, tanba pankada makaas iha parte ulun.
Nunee konsege vitima nain rua too iha HoREX Baukau matebian Floriana Xavier da Silva lori liu ba sala mortuariu hodi enterga ba familia, enkuantu vitima ida seluk daudaun kontinua halo tratamentu iha sala baixa.
“Atendimentu Polisia nian ita foti hela lokal do krime lori kareta trek nee mai no suspeitu ida neebe mak kaer kareta agora daudaun iha hela ita nia fatin atu nunee prosesu lao nafatin,” João Sancho Pires akresenta.
Nia deklara, insidente refere parte Polisia asegura ona evidente hanesan kareta baskolante ida no sei kontinua prosesu ba Ministeriu Publiku hafoin solusiona, tanba iha asidente refere sidadaun ida lakon vida no ida kanek grave, neebe daudaun halao hela tratamentu iha HoREX Baukau.
Diretor Klinika Hospital Rejional Eduardo Ximenes Baukau, Francisco Mouzinho esplika, vítima husi asindente refere nain 2 too iha HoREX Baukau, pur volta tuku 04:00 loraik, maibe pasiente nain ida la konsege salva, tanba hakotu ona iis iha prosesu translada pasiente iha dala klaran pasiente hakotu ona iis no nain ida konsege hetan tratamentu iha sala emerjensia HoREX Baukau.
“Ida fali nia kondisaun diak hela nia hanesan poli trauma, mais poli trauma diak hela, nia pankada iha matan mak bubu iha parte loos suku pontu rua ou tolu, inus ho tan ain naksalak nia kondisaun jeral diak,” hateten Francisco Mouzinho.
Enkuantu kondisaun vitima Flora idade 17 husi asidente nee, tuir deklarasaun husi Diretor Klinika HoREX Baukau kondisaun jeral diak, mezmu vitima hetan suku pontu tolu iha parte matan fukun los, ibun no ain parte loos naksalak.
Entretantu, dadaun vitima kontinua baixa iha sala sirurjia HoREX Baukau.
(tom)
