DILI, STLTIMORLESTE.com – Asidente neebe akontese iha Loja Funan Buras nia oin, Polísia Nasionál Timor Leste (PNTL) Komando Munisípiu Díli asegura ona suspeitu ba sela detensaun oras 72.
Komando Munisípiu Díli, Superintendente Xefe Polísia, Orlando Gomes dehan, kazu asidente fatal neebe akontese iha area Fomentu Postu, Administrativu Dom Aleixo, Munisipiu Díli, iha Loja Funan Buras nia oin, sidadaun feto ida neebe hakat ba zebra kross no motorizada halai ho velosidade makaas hodi soke sidadaun feto nee hetan kanek iha parte ulun. Tanba nee PNTL Komando Munisípiu Díli asegura ona suspeitu ba sela detensaun oras 72.
“Iha asidente nee ita nia sidadaun feto ida neebe hakat hela zebra Kross no motorizada halai ho velosidade makaas hodi soke ita nia sidadaun feto nee hetan kanek iha parte ulun, tilun no ain rua nee hotu,” hatete Superintendente Xefe Polísia, Orlando ba jornalista sira iha Komando Munisipiu Dili, Kinta (20/03/2025).
Nia esplika, suspeitu ho inisial MSC soke vitima iha Fomentu nee laiha karta kondusaun, ho idade 17 neebe kumpri ona 72 oras, hein desizaun husi Tribunal.
“Iha akontesimentu nee, ita nia patrulhamentu Komando Munisipiu Dili ho ita nia Polísia Unidade Tranzitu Dili ho rapidamente too kedas iha fatin akontesimentu hodi evakua vitima ba Hospital Nasionál Guido Valadares (HNGV) atu halo tratamentu saude, maibe too iha Sala Emerjensia HNGV vitima la konsege salva no hakotu iis,” nia deklara.
Nia informa, iha momentu neeba vitima nia mate isin lori kedas ba sala Mortuariu HNGV hodi entrega ba nia familia, enkuantu PNTL detein suspeitu ba sala detensaun durante oras 72, no halo prosesu hodi entrega ba Ministeriu Publiku (MP).
“Evidensia motorizada ita asegura ona iha Komando Munisipiu Dili, nunee ita kontinua prosesu kazu nee ba oin,” nia deklara.
(jen)
