BAUKAU, STLTIMORLESTE.com – Relasiona asidente neebe akontese iha area Abolir Foho Matebian hun, Suku Abo, Postu Administrativu Matebian, Munisipiu Baukau, Hospital Rejional Eduardo Ximenes (HoREX) Baukau transfere pasiente nain 1 ba Hospital Nasional Guido Valadares (HNGV) Dili, tanba hetan pankada makaas iha parte ulun no hirus matan.
Mediku iha sala emerjensia HoREX Baukau, Mario Sarmento hakuir, asidente nee akontese iha loron Sesta 12 Setembru 2025 parte loraik envolve neebe sala emerjensia HoREX Baukau simu pasiente nain 15, kompostu estudante estajiaria husi Instituto Superior Cristal (ISC) feto nain 13 husi departamentu parteira no nain 2, seluk mane kompostu kundotor no ajudante kareta.
Nia sublina, husi pasiente nain 15 nain 14 kompostu estudante estajiaria nain 13 no kundotor hetan kanek kamaan, enkuantu nain 1 seluk tenke transfere ba HNGV Dili hodi kontinua halo tratamentu, tanba hetan trauma kapitis no seluk tan.
“Ida trauma nee iha kapitis nomos trauma iha torex, tanba nee espesialista sira mai haree refere kedas ba Dili para halo tratamentu diak liu,” hateten Mario Sarmento ba jornalista sira, iha sala emerjensia HoREX, Baukau, Segunda (15/09/2025).
Mediku nee fundamenta, pasiente neebe transfere ba HNGV Dili deskonfia hetan pankada makaas iha parte ulun no hirus matan neebe difikulta pasiente dada iis. Nunee hafoin espesialista sira halo ezaminasaun deside transfere ba HNGV Dili hodi kontinua halo tratamentu saude diak liu tan.
“Parese pankada makaas tanba monu ho karreta, neebe ita konsidera ida nee trauma neebe makaas oituan,” Mario akresenta
Nia deklara, pasiente nain 14 seluk hanesan estudante estajiaria nain 13 no mane ida mezmu too sala emerjensia HoREX ho kondisaun kanek no trauma, maibe sei konsiente hela nunee hafoin remata observasaun iha sala emerjensia HoREX durante loron ida fo alta ona, tanba kondisaun diak.
Entretantu pasiente nain ida neebe HoREX Baukau transfere ba HNGV Dili mak, Ijinio Orlando idade 18 nuudar ajudante.
Fo hanoin fali ba publiku katak, asidente nee akontese bainhira estudante estajiaria nain 13 husi ISC inklui kundotor no ajudante ho karreta mikrolete marka Cheguevara diresaun husi Baukau Vila, objetivu halo peregrinasaun ba foho Matebian neebe too area estrada suvida Abulir foho Matebian hun hetan asidente karreta monu ba rai naruk.
Jornalista: Tomas Reis
Editora: Carme Ximenes
