BAUKAU, STLTIMORLESTE.com – Asidente neebe akontese iha Suku Serlau, Postu Administrativu Lautem, Munisipiu Lautem, entre kareta Hilux rua (2) rezulta nain lima (5) kanek no nain ida (1) mate hafoin too iha hospital Lautem.
Komadante Polisia Munisipiu Lautem, Superintendente João da Costa esplika, kronolojia ba asidente refere akontese iha loron 01 Julhu, bainhira kareta privadu marka Hilux ida husi diresaun Baukau ba Lautem no kareta Hilux privadu ida husi diresaun Lautem ba Baukau iha neebe too iha area Suku Serlau pur volta tuku 03:00 loraik hasoru asidente refere hodi rezulta motorista no pasajeiru sira hetan kanek no ida mate.
“Informasaun loos duni horiseik akontese tuku 03:00 loraik, informasaun mai Komando kareta Hilux rua mak soke malu iha neeba, vitima sira ba ona hospital, husi diresaun Lospalos ba Dili mak mane ida mate iha Hospital Lautem,” hateten Komadante Polisia Munisipiu Lautem, João da Costa ba STL liu husi telefone, Kuarta (02/07/2025).
Nia sublina, asindente nee involvime nain neen (6) neebe hafoin akontese evakua kedas ba Hospital Lautem neebe nain 1 la konsege salva, tanba pankada makaas no nain lima (5) seluk kondisaun hetan kanek, nunee nain 1 daudaun halo tratamentu iha Hospital Lautem no nain haat (4) seluk transfere kedas ba Hospital Rejional Eduardo Ximenes Baukau hodi kontinua halo tratamentu, tanba kategoria kondisaun grave.
Nia fundamenta, asindente nee akontese tanba kauza husi parte rua konduz kareta ho velosidade halai ses hodi soke malu no deskonfia konsumu alkolika, tanba parte Polisia hetan evidensia iha kareta laran.
“Nee prosesu normal, asidente iha neebe deit ita rekolha evidensia sira hodi prosesu investigasaun iha tranzitu depois aprezenta ba Ministeriu Publiku,” João da Costa akresenta.
Nia deklara, ba asindente refere parte Polisia Tranzitu Munisipiu Lautem rekolha ona evidensia no prosesu investigasaun hafoin aprezenta ba Ministeriu Publiku (MP) hodi kontinua prosesu ba oin, enkuantu evidensia sira daudaun parte tranzitu asegura no vitima sira halo tratamentu saude iha Hospital Lautem no Hospital Rejional Eduardo Ximenes Baukau.
Liga asuntu nee STL tenta konfirma parte mediku sira iha Sala Emerjensia HoREX nian, maibe pasiente husi asidente neebe simu nain rua fo ona alta hodi fila ba uma, tanba kondisaun kmaan, enkuantu nain 1 transfere ona ba Hospital Nasional Guido Valadares Dili, tanba kondisaun grave.
(tom)
