BAUKAU, STLTIMORLESTE.com – Asidente iha Suku Vemasi, Postu Administrativu Vemasi, Munisipiu Baukau, rezulta sidadaun Maria Correia idade 59 husi Aldeia Betulale, Suku Vemasi lakon vida, tanba hetan soke husi motor.
Administradora Postu Administrativu Vemasi, Elda Maria Viegas de Sousa Freitas informa, asidente nee akontese iha loron 25 Setembru nee parte kalan bainhira motorizada ida diresaun husi Kapital Dili ba Baukau halai ho velosidade too iha estrada publiku area Suku Vemasi soke sidadaun ida, tanba korta estrada.
“Soke nee mate tiha ona fatin mak foin sira lori ba Hospital maibe labele, labele salva. Motor nee ho velosidade makaas, sidadaun nee ultrapasa mai sorin soke kedas,” Elda informa iha Vemasi, Sabadu (27/09/2025).
Hafoin asindete nee akontese parte familia tenta lori vitima ba Hospital Rejional Eduardo Ximenes (HoREX) Baukau, maibe la konsege salva, tanba vitima refere mate kedas iha fatin asidente. Enkuantu evidensia hanesan motorizada inklui motorista parte tranzitu evakua kedas ba edifisiu Komando Polisia Munisipiu Baukau hodi submete ba prosesu kontinuasaun.
Autoridade Postu nee preokupa ho motorista sira neebe konduz kareta no motor, tanba konduz motor no kareta too iha area komunidade hela la reduz velosidade nunee lakon kontrolu hakotu sidadaun neebe lao nia vida iha estrada publiku.
“Tenke fo atensaun ba motorista sira iha dalan publiku haree komunidade barak tenke halai ho velosidade redus,” Elda sujere.
Iha sorin seluk, Komadante Komando Polisia Munisipiu Baukau, Superintendente João Sancho Pires informa, ba asidente refere motorista daudaun asegura ona iha Edifisiu Komando Polisia Baukau inklui ho evidensia hanesan motorizada hodi prosesu tuir lei kodigu estrada.
“Ita husu ba motorista sira primeiru dalan diak ona, agora ita neebe utentes uza motor ho kareta ita tenke haree reduz velosidade, tanba agora soke ema animal barak nunee tenke evita velosidade lao neineik mak too fatin,” João Sancho Pires argumentu.
Entretantu motor neebe involve iha asidente refere marka Honda Sonic sapa matrikula S.2535 konduz husi Natalino Guterres diresaun husi Dili atu ba Suku Atelari, Postu Administrativu Laga, Munisipiu Baukau, maibe hetan asindete iha area refere tanba ho velosidade.
Jornalista: Tomas Reis
Editor: Xisto Mendonça
