BAUKAU, STLTIMORLESTE.com – Iha loron 06 Julhu tinan nee parte loraik mosu asidente iha area Vila Nova, Postu Administrativu Baukau Vila, entre motor mio no kareta trek rezulta sidadun ida mate fatin.
Diretor Klinika Hospital Rejional Eduardo Ximenes Baukau, Mouzinho Francisco esplika, iha loron 06 Julhu nee Sala Emerjensia Hospital Rejional Eduardo Ximenes Baukau simu kazu asindente hamutuk tolu, kompostu asidente iha Postu Administrativu Venilale entre kareta ho motor rezulta vitima nain rua nuudar feen laen iha neebe feen kondisaun grave, tanba hetan pankada iha parte ulun no asidente motor ida monu mesak iha area Watabo, tanba kondisaun lanu iha neebe rezulta motorista kanek todan iha parte ulun no ain.
Enkuantu asidente iha area Vila Nova Baukau entre motor mio no kareta trek rezulta sidadaun ida neebe tula husi oan ho motor mio lakon vida, tanba ulun rahun iha fatin asidente.
“Oriseik rejistu iha emerjensia nee tolu, ida hodi kalan nee apa ho oan soke kareta, nia apa mate fatin,nia oan mai mais diak fo alta tiha ona, ida motor soke kareta iha Venilale laen ho feen, nia laen diak hela, nia feen mak agora kondisaun observa hela iha hospital no ida tan mak lanu monu mesak iha Wataboo nee mak pankada iha ulun no ain naksalak,” hateten Mouzinho ba jornalista sira iha HoREX Baukau, Segunda (07/07/2025).
Diretor Klinika Hospital Rejional Eduardo Ximenes Baukau nee sublina, asindente husi Postu Administrativu Venilale vitima mane parte mediku fo ona karta alta, tanba kondisaun kanek kmaan, enkuantu feto kontinua halo tratamentu iha sala baixa Hospital Rejional Eduardo Ximenes Baukau no posibilidade bele halo transferensia ba Hospital Nasional Guido Valadares Dili, tanba kondisaun grave iha parte ulun no asidente monu mesak ho motor iha area Wataboo kontinua baixa iha sala tratamentu, tanba hetan pankada makaas iha parte ulun.
Enkuantu asidente iha area Vila Nova vitima nain rua konsege lori ba Hospital Rejional Eduardo Ximenes Baukau iha neebe matebian nia mate isin too iha sala emerjensia lori kedas ba sala mortuariu hodi entrega ba parte familia no oan mane kontinua halo tratamentu hafoin alta iha loron 07 Julhu nee.
“Nia oan kondisaun diak foin fo alta tiha ona. Nia apa mai mate entaun lori liu ba mortuariu ami la konsege rejistu, tuir kronolojia soke kareta kada vez sama nia ulun nee mak rahun,” Mouzinho akresenta.
Liga asuntu nee STL tenta konfirma Komadante Komando Polisia Munisipiu Baukau, Superintendente João Sancho Pires maibe laiha fatin atu fo komentariu, tanba tuir hela atividade balun iha fatin seluk.
Entretantu tuir nota informativa neebe STL asesu husi ekipa Polisia Tranzitu Munisipiu Baukau, asidente iha area Vila Nova entre kareta trek sapa matrikula 53.833 ho motor mio sapa matrikula marka P. 0110 rezulta sidadaun Domingos Savio Belo idade 52 nuudar pasajeiru husi motor refere lakon vida iha fatin asidente.
Tuir observasaun STL nian iha terenu nota katak, evidensia ba asidente refere hanesan motor no kareta asegura ona iha edifisiu Komando Polisia Munisipiu Baukau.
(tom)
