BUAKAU, STLTIMORLESTE.com – Asidente Kairavela, Hospital Rejional Eduardo Ximenes (HoREX) Baukau rejistu vitima ho kondisaun grave nain 2, hetan tohar nain 3, mate nain 2, no kondisaun kanek kmaan nain 9.
“Asidente nee nain 2 transfere ba Dili, 2 mate, nain 3 agora sei baixa no nain 9 mak observasi, tanba kondisaun kmaan, observasi oras 2 sira fila ba uma,” hatete Mediku Jeral, Basilia Freitas iha sala Emerjensia HoREX, Baukau, Sesta (20/12/2024).
Tuir nia, hafoin asidente refere akontese, parte HoREX simu pasiente hamutuk nain 15, la inklui ho vitima mate fatin, maibe iha pasiente nain 2 ho kondisaun mate, tanba hetan pankada makaas parte ulun. Nunee iha pasiente nain 14 neebe nain 2 tenke transfere ona ba Dili hodi kontinua halo tratamentu tanba ho kondisaun grave, hanesan trauma capiteis neebe presiza halo teste CT Scan.
Daudaun nee HoREX kontinua tau matan hela ba pasiente nain 3, tanba hetan tohar nunee baixa hela iha sala sirurjia hodi kontinua hetan tratamentu husi mediku sira. Maibe pasiente nain 9 hetan observasaun saude husi mediku sira iha sala emerjensia HoREX durante oras 2, parte HoREX fo ona autorizasaun hodi fila ba uma, tanba kondisaun kanek kmaan.
Entretantu vitima hirak nee HoREX rejistu husi asidente iha area Kairavela, Postu Vemasi, iha loron 18 Dezembru 2024 parte loraik entre bis husi Diresaun husi Dili – Baukau no karreta Toyota Hilux husi Baukau – Dili.
(EST 2)
