BAUKAU, STLTIMORLESTE.com – Asidente entre motorizada no bis dirasaun Lautem – Dili neebe akontese iha Suku Buruma, Postu Administrativu Baukau Vila, Munisipiu Baukau, rezulta motorista inisial MM lakon vida no pasajeiru inisial LC hetan tohar iha parte ain.
Komandante interinu Komando Polisia Nasional Timor Leste Munisipiu Baukau, Superintendente João Sancho Pires esplika, asidente refere akontese iha loron 12 Abril tinan nee, iha neebe bis sapa matrikula 38-627 diresaun husi Lautem ba Dili no motorizada mega pro sapa matrikula I.3233, konduz husi vitima mane inisial MM, idade 30 tula pasajeiru feto inisial LC idade 17, diresaun husi Baukau Vila ba Laga, maibe too iha area Suku Buruma hetan soke husi bis, hodi rezulta vitima MM hetan pankada makaas iha parte ulun no pasajeiru LC hetan tohar iha parte ain loos.
“Asidente iha Buruma nee bis soke motor mega pro ita evakua kedas vitima nain 2 ba Hospital Baukau aproveita lori liu ba Dili,” hateten João Sancho Pires ba jornalista sira iha knaar fatin Vila Antiga, Baukau, Segunda (14/04/2025).
Komandante nee sublina, bainhira asidente nee akontese Komando Polisia Nasional Timor Leste Munisipiu Baukau liu husi ekipa seksaun tranzitu too iha fatin akontesimentu hodi rekolha informasaun no evakua vitima ba Hospital Rejional Eduardo Ximenes Baukau.
Maibe haree kondisaun vitima nain rua grave, nunee kontinua transfere ba Hospital Nasional Guido Valadares, maibe MM la konsege salva vida, tanba hetan pankada makaas.
“Informasaun neebe mak mai, mane (MM) nee mate tiha ona, horiseik lori tiha ona mai Uailili, nia prosesu investigasaun ita kontinua,” João akresenta.
Komandante João Sancho Pires sublina, kazu asindente refere parte Komando Polisia Munisipiu Baukau daudaun prepara relatoriu atu aprezenta ba Ministeiru Publiku hodi fo solusaun.
Entretantu evidensia hanesan kareta bis no motoriza mega pro daudaun asegura ona iha edifisiu komando Polisia Munisipiu Baukau hodi hein prosesu investigasaun.
(tom)
