DILI, STLTIMORLESTE.com – Komando Polisia Nasionál Timor Leste (PNTL) Munisípiu Dili asegura ona suspeitu sira ba kazu asidente trafiku neebe mak akontese iha area Ponte Fomentu III, Komoro, iha loron 01 Junhu tinan nee.
“Hau hatete katak kazu asidente nee akontese horiseik domingu (01/06) né’ebe mak rezulta vitima rua kanek, ida kanek grave no ida seluk ninia liman tohar,” hatete Komandante Munisípiu Dili, Superentedente Xefe Polisia Orlando Gomes ba jornalista sira iha KMD, Segunda (02/06/2025).
Nia dehan, hafoin akontese asidente, nia dehan ekipa investigasaun husi Tranzitu Seguransa Rodaviariu too kedas iha fatin akontesimentu asidente hodi halo atendimentu.
Nia esplika, iha fatin asidente nee vitima sira asegura kedas, no vitima mos evakua kedas ba iha Hospital Nasionál Guido Valadares (HNGV) hodi halo tratamentu saude.
“Agora kona-ba suspeitu sira ita lori mai asegura iha Komando Munisipiu Dili,” nia informa.
Nia koalia, tuir informasaun neebe asesu katak, kazu asidente trafiku nee tanba deskonfia membru polisia sira utiliza kareta ho kondisaun lanu mak soke vitima sira ho motor hodi monu-tun ba ponte okos iha area Fomentu, Komoro nian.
Ho nunee, ligadu bá membru polisia neebe ho kondisaun hemu tua lanu konduz kareta. Tan nee Komandante Munisípiu Dili nee seidauk fo sai lo-loos, tanba kazu asidente nee sei prosesu investigasaun.
“Ita sei iha prosesu hela, tanba ita seidauk hatene, tanba ita seidauk identifika katak sira lanu, tanba sei iha prosesu halo hela identifikasaun ba ninia kondisoes,” nia relata.
Komandante Munisípiu Dili nee mos informa, kona-ba evidensia sira ligadu ba asidente refere, Komando Munisipiu Dili asegura hela hodi submete bá Ministeriu Publiku.
“Evidensia sira asegura hotu iha nee, ita hodi submete ba iha prosesu,” nia koalia.
Nia hatutan, ligadu bá kondisaun membru PNTL sira, nia hateten kondisaun membru polisia sira iha asidente nee hetan kanek oituan hanesan iha parte oin hasan nian, maibe ladun grave.
“Ita nia tranzitu investigasaun foti ona sira (membru polisia) bá halo identifikasaun, depois asegura sira nia evidensia no prosesu ita rejista ona iha Ministeriu Publiku hotu ona, inklui suspeitu no vitima sira hotu,” koalia.
Entretantu observasaun neebe STL asesu iha terenu, iha asidente nee iha vitima nain rua neebe hetan kanek grave no ida liman tohar, nia afirma vitima nain rua nee dadauk nee halo hela tratamentu saude iha Hospital Nasionál Guido Valadares (HNGV).
(jen)
