DILI, STLTIMORLESTE.com – Iha loron Tersa (01/07/2025), tuku 02:56 laraik, akontese asidente husi kareta Hilux ho Triton iha Aldeia Buihomaun, Suku Serelau, Postu Administrativu Lautem, Munisípiu Lautem, rezultadu vitima ho naran Junito Mendes lakon vida.
Nia dehan, asidente akontese iha loron Segunda 01 Julhu tuku 02:56 lokraik, iha Aldeia Buihomau, Suku Serelau, Postu Administrativu Lautém, Munisípiu Lautém.
Tuir informasaun neebe Seksaun Tranzitu Seguransa Rodaviariu Munisípiu Lautém relata ba iha Diresaun Tránzitu Nasionál katak, asidente nee fatal, tanba kauza husi fatór umanu, tanba kondutor Triton nee halai ho velosidade neebe makaas.
“Hau informa katak, akontesimentu ida iha Lautem nee Hilux husi Diresaun Lautem mai Dili no Triton husi Diresaun Díli atu ba Lospalos ho velosidade neebe makaas, entaun Hilux soke malu ho Triton hodi rezulta motorista Hilux nian mate fatin,” hatete Diretór Diresaun Tránzitu Seguransa Rodaviariu Nasionál (DTSRN), Superintendente Asistente Polísia, Luis da Costa ba jornalista sira iha Komando PNTL Jerál Kaikoli, Dili, Kuarta (02/07/2025).
Nia esplika, husi asidente nee karreta Hilux nia pasajeirus nain 2 no husi kareta Triton ho nia pasajeirus nain 4 ho kondisaun grave, nunee Polísia Eskuadra Postu Lautém evakua ona ba Hospitál Referál Baukau hodi halo tratamentu saude.
“Iha akontesimentu nee ita nia PNTL Munisípiu Lautem husi Diresaun Tránzitu Seguransa Rodaviáriu Munisípiu Lautém halo prosesu ona no sei aprezenta ba Ministeriu Públiku,” nia informa.
Luis mos hateten katak, iha informasaun dehan kondutor nee laku mak too rezulta asidente nee, maibe husi parte PNTL liu-liu sesaun Tranzitu Seguransa Rodaviaria Munisípiu Lautem sei halo investigasaun.
“Ba kazu nee investigasaun lao hela, ita labele fo uluk konkluzaun, tanba agora daudaun husi sesaun Tranzitu Seguransa Rodavizaria Komando Munisipiu Lautem sei halo investigasaun ba kazu nee,” nia konklui.
Iha fatin ketak, dasin Alberico da Costa dehan, akontesimentu asidente nee tanba kareta Hilux ho volisidade neebe makaas husi Lospalos no kareta Triton soke malu tanba sira la kontrola.
“Ami nia primu Junito Mendes lakon vida tanba kareta nia tuir nee hanehan kedas nia ulun nomos ulun rahun, maibe iha momentu neeba primu nee sei moris, maibe distansia neebe dook husi hospital no kareta ambulasia mos la too, primu hiit liman too iis laiha,” nia informa.
Nia afirma, iha kareta Hilux nee nia laran ida mak matebian Junito Mendes ho kareta nain kanek kmaan, kareta ida seluk nee ema nain 4, maibe ida seluk nee mos la oras mate no nain 3 kanek todan.
(jen)
