DILI, STLTIMORLESTE.com – Asosiasaun Futebol hamutuk 13 submete kandidatu, Prezidente ba Federasaun Futebol Timor Leste (FFTL)
Porta Voz no atual Prezidente Asosiasaun Futebol Munisipiu Ermera, Lomelino Salsinha hatete, bazeia ba notifikasaun husi Federasaun Futebol Timor Leste ba asosiasaun sira neebe husu atu submete dokumentu kandidatu Prezidente Federasaun Timor Leste.
Tanba nee mak asosiasaun Futebol sira tenki prienxe lalais rejistu husi Federasaun Futebol Timor Leste, hodi submete kandidatura Prezidente FFTL ba komite eleitoral.
“Bazeia ba notifikasaun husi Federasaun Futebol Timor Leste (FFTL) tuir artigu 27 estatutu FFTL nian, ohin ami mai submete ami nia lista kandidatura Prezidente ba Federasaun Futebol Timor Leste,” hatete Lomelino ba jornalista sira iha edifisiu FFTL, Bairu Formoza, Dili, Kuarta (27/11/2024).
Porta voz nee hatutan, nia labele fo sai kandidatu neebe sira submete, tanba nee kompetensia husi Komite elitoral husi Federasaun Futebol Timor Leste (FFTL) atu anunsia iha tempu besik.
Maibe atu lori Futebol Timor Leste lao ba oin la presiza ema neebe iha osan, maibe presiza Timoroan neebe iha vontade atu dezenvolve Futebol Timor Leste atu lao ba oin.
Tanba selesaun nasional sira ba tuir kompetisaun iha rai liur la hetan rezultadu neebe mak diak, no dezenvolvimentu futebol iha rai laran mos la lao, tanba nee FFTL presiza kore aan husi situasaun ida nee liu husi membru asosiasaun sira hanesan arbitrajen, juridiku ho treindador sira atu haree, tanba sira mak sai hanesan fatores determinante atu lori futebol lao ba oin.
No kandidatu neebe sira aprezenta hetan apoiu husi asosiasaun futebol hamutuk 13.
Entretantu Federasaun Futebol Timor Leste (FFTL) sei realiza kongresu iha loron 11 Janeiru 2025, hodi hili Prezidente FFTL ba periodu tinan 5 mai.
(alb)
