DILI, STLTIMORLESTE.com – Asosiasaun Jerasaun Patriota selebra aniversáriu ba dala X, ho tema “Momentu Istóriku Tinan 10 Ezisténsia Jerasaun Patriota, husi Pasadu ba Futuru”.
Nia dehan, jerasaun patriota halao semináriu reflesaun hodi selebra ezistensia ba dala X iha tinan 2025, no agora iha loron sabadu 24 realiza misa agradesimentu selebrasaun iha Polísia Akademia Komoro.
“Ita halao atividade semináriu reflesaun ida selebra aniversáriu jerasaun patriota ba dala X nomos halo reflesaun hodi konta hikas husi inisiu harii jerasaun patriota too agora,” hatete Xefe Komisaun Organizadora Jerasaun Patriota, Erminio Savier ba STL iha sala auditório F-FDTL Fatuhada Dili, Sabadu (24/05/2025).
Nia esplika, jerasaun patriota lao ona tinan 10, tanba nee momentu istóríku tanba liu tiha tinan 10 movimentu nee legalmente hamriik nuudar organizasaun ida tuir Lei neebe vigora iha Estadu Timor Leste no rekonhese hanesan asosiasaun neebe halibur funu nain hotu sira nia oan.
Nia informa, loron 20 fulan Maiu 2015 no transforma ba Asosiasaun fulan Maiu tinan 2025, liu husi sertidaun firma neebe husi Dirasaun Nasional Rejistu Notariadu.
“Iha tinan ida nee liu-liu dia 20 Maiu, ami komemora ezistensia ami nia organizasaun ba tinan 10, tanba nee ami halo eventu durante loron rua, eventu loron permeiru nee reflesaun deit, no Sabadu foku deit ba komemorasaun nian deit, nomos aban dia 25 nee loron Prezidente Nicolao Lobato ninia, halo aniversáriu ba tinan 10,” nia deklara.
Nia koalia, espetativa Organizasaun Jerasaun Patriota nian mak bele kontribui buat diak ida ba nasaun RDTL no liu-liu kontribui kria pas no estabilidade no konsolida forsa hamutuk ho joven sira bele kontribui ba nasaun nee nian dezenvoliventu neebe ho diak.
Iha fatin hanesan, Veteranu Custódio Belo “Alin Laek” informa, parabéns ba Jerasaun Patriota neebe harii ona organizasaun ida neebe iha lian, para atu bele koalia saida mak los no saida mak lalos.
“Hau nia parabéns ba jerasaun patriota sira, tanba ukun aan la fasil, ukun aan sosa ho raan ho isin, tanba nee liu husi organizasaun Jerasaun Patriota tenke koalia los, halibur imi nia raan maluk sira hodi deven los, tenke koalia sai buat neebe la los,” nia afirma.
Nia afirma, Presidente Nicolao Lobato idade joven 21 nee ondra ba Timor Leste, tanba nee agradese ba Jerasaun Patriota ida neebe bele koalia los hodi kontribui ba dezenvolvimentu iha rai ida nee.
(jen)
