DILI, STLTIMORLESTE.com – Asosiasaun Marineiru Timor Leste (AMTL) husu Komisaun Anti Korupsaun (KAK) atu halo investigasaun ba Autoridade Portuariu Timor Leste (APORTIL), tanba aloka ona orsamentu US$ 786.000 hodi halo manutensaun ba roo Berlin Nakroma, maibe roo nee halo operasaun la kleur avaria fila fali.
Prezidente AMTL, Simplicio Marcos Ximenes hateten, KAK presiza halo investigasaun, tanba APORTIL aloka ona orsamentu US$ 786.000 hodi halo manutensaun ba roo Berlin Nakroma maibe roo nee uza la kleur avaria fila fali ona.
”Sim ita husu ba KAK atu halo investigasaun hodi buka tuir irregularidade ruma mak mosu iha neeba,” hatete Prezidente AMTL, Simplicio Marcos Ximenes ba jornalista sira iha salaun edifisiu Xanana Reading Room, Lesidere, Kuarta nee (25/06/2025).
Nia hatutan, liu husi investigasaun mak bele deteta katak ida nee aat, tanba ida nee sira mak hatene liu, AMTL somente fo informasaun ba publiku katak realidade mak nee.
Tanba nee nia husu ba APOERTIL tenke aprezenta relatoriu lo-loos ba KAK kona-ba orsamentu neebe aloka halo manutensaun ba roo Berlin Nakorma nee, nunee publiku bele hatene.
“Kustu manutensaun nee US$ 786.000 no sira fahe break down nee kabe ba kompetensia APORTIL nian, tanba sira mak jere osan nee, agora ita nia parte katak roo nee ba halo manutensaun durante fulan lima kedas mak mai fali maibe uza la kleur kondisaun aat fali nee tanba saida, nee perguntas ba ita,”
“Ita nia observasaun neebe ita haree katak buat neebe iha nee lao la diak duni no aat duni, sira mos rekonhese katak ida nee falha duni,” katak nia.
(alb)
