DILI, STLTIMORLESTE.com – Membru Asosiasaun Médika Katólika Timor Leste halo enkontru ho Prezidente Republika, Jose Ramos Horta, hodi husu Xefe Estadu oinsa atu fo rekonhesimentu b sira nia asosiasaun nunee sira bele halo atendimentu ba povu.
Bainhira remata hasoru malu Prezidente Asosiasaun Médika Katólika Timor-Leste, Laura António de Jesus ba jornalista sira iha Palasiu Prezidensial, Nicolalu Lobato, Bairo Pite, Dili, Sesta (28/02/2025) hatete, objetivu hasoru Prezidente hakarak husu oinsa apoiu sira nia asosiasaun neebe foin harii iha tinan kotuk.
“Ami nia objetivu hasoru Prezidente ami hakarak husu deit oinsa apoiu Governu nia ba iha ami nia asosiasaun rasik, liu-liu ami nia projetu neebe daudaun nee atu implementa katak apoiu ba kapasitasaun mediku graduadu neebe daudaun nee ita nia rai Timor Leste, ami espera katak ba futuru mai husi Governu nomos Prezidente rasik bele apoiu ami iha ami nia projetu nee nomos ami fiar katak projetu nee nia sustentabilidade ba oin bele lao ho diak no ami hanesan mediku graduadu nomos kapasita ami nunee ami fo asistensia saude neebe diak ba komunidade sira,” katak nia.
Nia hatutan, apoiu neebe Prezidente Republika atu fo ba sira intermus de rekomendasaun, tanba asosiaun nee foin harii, tanba nee presiza rekomendasaun ida nunee bele sai kredibilidade ba sira, nunee projetu no programa sira bele hetan rekonhese no bele iha kredibilidade iha futuru.
“Futuru mai ami nafatin halo orasaun ho Prezidente, nunee projetu sira neebe ami implementa bele lao ho diak ba iha futuru,” katak nia.
Nia hatete, rekomendasaun nee katak Prezidente mos bele rekonhese katak sira hanesan asosiasaun neebe forma husi Katoliku Timor Leste nomos rekonhese katak sira pratika hanesan medika bele implemementa tuir tema medisina katak trata ema hotu hanesan, trata ema ho domin no sakrifika aan hodi trata komunidade ho diak la haree katak nee mai husi neebe, maibe trata ho domin ho profisaun neebe sira iha.
“Ami nia asosiasaun nee eziste formalmente tinan kotuk 2024 bainhira ami tuir kongresu iha 2024,” katak nia.
Nia hatutan, membru husi asosiasaun nee total 13 pesoas, maibe nain 3 hanesan membru Konselhu no nain 10 hanesan Board, maibe iha futuru mai hakarak rekruta membru barak liu-liu ema neebe hakarak atu kontribui trata sidadaun ho dignu no ho domin.
(eme)
