BAUKAU, STLTIMORLESTE.com – Visi Primeiru Ministru, Ministru Koordenador ba Asuntu Sosial no Ministru ba Dezenvolvimentu Rural no Abitasaun Komunitaria, Mariano Assanami Sabino hateten, Timor Leste eziste ho arte marsiais no partidu politiku oin-oin laos atu odiu malu.
“Ita nee Nasaun Republika Demokratiku Timor Leste, nasaun nee republika, nasaun nee demokratiku, tanba nee ita iha Partidu oin-oin, ita iha instituisaun, arte marsiais oi-oin, ita iha arte rituais oin-oin, oin-oin sira nee hotu ita nia riku, laos atu divida ita fahe ita halo ita la kontente, laos atu pertense ida odiu ida seluk lae, ita nee maun alin” dehan Assanami liu husi nia diskursu bainhira halao serimonia dialogu ho estudante sira iha salaun Ginaziu Vila Nova, Baukau, Tersa (14/10/2025).
Timor Leste tuir nia eziste ho arte marsiais, rituais, institusaun no partidu politiku oin-oin, tanba Timor Leste hamriik hanesan Nasaun Republika Demokratiku, nunee ezistesia arte marsiais no seluk tan laos atu fahe Timoroan nia hamutuk, maibe arte marsiais no seluk tan nuudar intrumentu no rikusoin Timor nian.
Nunee hanesan Timoroan buka hamutuk nafatin tane malu, tanba nasaun ida atu lao ba oin prezisa ema hotu nia hamutuk liu husi hadomi malu.
“Ita nee maun alin, importante atu hamnasa hasoru malu fo bondia hakuak malu kontente para avansa lao ba oin, laos ba iha ida neeba tauk, ida seluk treina ita ba haree seluk ba treina ita haree, tanba nee se deit mak kuidadu ema seluk fo domin ba ema seluk kria ambiente diak, ambiente hakmatek ambiente saudavel mak nia halo ona nia papel importante asuwain nian, nia respeitu ona eroi sira,” Assanami salienta.
Nunee mos mezmu husi Partidu politiku keta-ketak maibe hamnasa ba malu nee importante, laos husi partidu keta-ketak atu inimigu ba malu, tanba partidu keta-ketak atu fo espasu ba eleitores sira atu hili tuir politika kampanha politikus nian.
Mezmu nunee, Assanami konsidera liu husi politika mak inimigu ba malu, nee nuudar motivador ida ba ita atu prepara no kadi ita nia kakukat diak liu tan, nunee labele halo inimigu ho partidu politikus ida neebe halo inimigu ho ida no labele halo inimigu ho maluk husi arte marsiais no rituais ketak, tanba ita mesak Timor oan deit.
Iha fatin hanesan, Prezidente Autoridade Munisipiu Baukau, Veneranda Lemos informa, durante tinan ida ona situasaun iha Munisipiu Baukau lao hakmatek, tanba kontribuisaun makaas husi joven sira.
“Dala barak iha disturbiu ba seguransa ema hakilar mak joven sira arte marsiais, maibe tinan ida ho balu joven sira iha Baukau hatudu sira nia maturidade, sira baruk moris iha disturbui nia laran, baku malu oho malu sunu malu,” Veneranda komenta.
Mezmu nunee, maibe Prezidente Autoridade Munisipiu Baukau nee husu joven sira nafatin kria ambiente pas no estabilidade iha Baukau.
“Hau hateten ba Vise Primeiru Ministru katak, Baukau nee hakmatek kontribuisaun mai husi jovem sira, kontinua nafatin ida nee ita sei hasoru loron boot finadu, natal no tinan foun, tinan kotuk ita hatudu komportamentu diak tebes hatudu dehan ita matenek,” katak Veneranda.
Jornalista: Tomas Reis
Editora: Carme Ximenes
