DILI, STLTIMORLESTE.com – Primeiru Ministru Interinu atual Vise Primeiru Ministru, Mariano Assanami Sabino hamutuk ho Ministru Edukasaun Interinu, Domingos Lopes Lemos, halo dialogu ba paz no formasaun karakter ba Eskola Sekundáriu Jeral 10 Dezembru no EBC 10 Dezembru Komoro, liu husi dialogu nee husu estudantes sira aprende no estuda.
Vise PM Interinu nee husu ba estudantes no joven sira mak nasaun nee nia nain, tanba nee tenke aprende ho diak, estuda halo didiak, nomos utiliza tempu ho diak, tanba sira mak futuru ba nasaun ida nee, inan aman hein iha uma, oan mai eskola sai matenek para bele lori rai nee ba oin, laos fila ba uma ho raan, kanek ho matan-been, dialogu nee ho pilar haat mak hanesan konstrusaun paz, estadu, nasaun no karakter.
“Ita nia oan sira presiza iha kondisaun neebe mak diak, tanba nee ohin ita halo dialogu nee ho nia pilar haat mak hanesan konstrusaun paz, estadu, nasaun no karakter. Pilar haat nee importante tebes ba oan sira no joven sira hotu, tanba nasaun ida nee ba oin konta ho imi nian potensial, tanba nee bele iha partidu oin-oin no arte marsiais oin-oin, maibe ita Timor oan tenke ba oin, tanba nee la haree organizasaun no la haree ba iha partidu no la haree ba iha relijiaun, maibe kuandu individu ida mak nakar sunu ema nia uma no halo violensia tenke hasoru tribunal, ida nee mak ohin ita halo dialogu,” dehan Vise PM Interinu, Assanami ba jornalista sira, Tersa nee (01/07/2025).
Nunee mos Ministru Edukasaun Interinu, Domingos Lopes Lemos dehan, ohin nee halo dialogu ho eskola rua, EBC 10 Dezembru no ESJ 10 Dezembru ho nia objetivu atu sosializa pas, tanba iha Dili laran nee eskola neebe identifikadu ba problema no tuir programa Vise Primeiru Ministru nian sei tama hotu eskola sira nee, atu nunee bele fo hanoin estudantes sira no profesores sira halao aprendizajen ba estudantes ho diak.
“Hau hanoin liu husi dialogu ida nee bele fo hanoin ba ita nian estudantes sira husi eskola rua nee, nomos husu ba inan aman sira oinsa nafatin fo hanoin ba oan sira, atu nunee mai eskola tuir lisaun ho diak, tanba ita nian estudantes mak futuru ba rai ida nee, entaun mai eskola aprende saida mak profesor fo ba sira,” nia esplika.
Entretantu Diretor Eskola Sekundáriu Jeral 10 Dezembru Komoro, Manuel Verdial dehan, dialogu ida ohin nee bele dehan pozitivu tebes-tebes ba eskola ida nee, Timor oan hotu nia oan mak mai eskola iha nee.
“Tanba nee ita nian estudantes idak-idak mai ho nia karakter neebe la hanesan, maibe balun ema neebe komprende, maibe balun lae, Timor oan haree malu laos Timor oan, maibe haree malu hanesan ema seluk, tanba nee ohin sama atensaun mai eskola ida nee atu haree karakter ida neebe ita atu livre husi situasaun hotu-hotu,” katak nia.
(jac)
