DILI, STLTIMORLESTE.com – Visi Primeiru Ministru no Ministru Koordenador ba Asuntu Sosial, Mariano Assanami Sabino husu ba Profisional Saúde sira atu salva pasiente sira tuir juramentu neebe halao ona.
Nia dehan, Pesoal Saude nia servisu nee iha deit mak Salvador ho pasiente, laiha kor partidu no laiha politika iha neeba, tanba mediku nia servisu atu fo atendimentu ba pasiente.
“Mediku hotu-hotu nia funsaun prinsipal mak nia nuudar Salvador atu salva pasiente, tanba imi jura katak imi sai salvador ba pasiente sira ho didikasaun, tanba servisu laos ho matenek maibe ho kurasaun,” hatene Assanami liu husi diskursu iha MS, Kaikoli, Dili, Kuarta (04/12/2024).
Saude no Edukasaun tuir Governate nee katak, pilar importante ba estadu no ba nasaun, tanba nee tenke tau iha planu estratejiku dezenvolvimentu nasional.
No Profisional Saude sira nia servisu mos importante tebes, maski ekipamentus seidauk too, fasilidade seidauk too, maibe mantein ho juramentu.
Antes nee Xefe Departementu Emerjensia Hospital Nasional Guido Valadares (HNGV), Julia Rodriques Quintao esplika, kona-ba atendimentu saude ba pasiente sira iha sala Emerjensia Hospital Nasional Guido Valadares ( HNGV) lao normal hanesan baibain.
No sira sempre fo atendimentu neebe diak ba pasiente sira, tanba sira moras mak mai halo tratamentu, tanba nee sempre fo atendimentu neebe dignu ba sira.
Nunee mos Pasiente Luciano Moggi da Silva hatete, atendimentu iha sala Emerjensia HNGV lao diak tebes, sira atendimentu jeral, maibe sira fo atendimentu neebe dignu ba pasiente.
(jen)
