DILI, STLTIMORLESTE.com – Assosiasaun Futebol Timor Leste hamutuk 13 dezafia Prezidente Asosiasaun Futebol Dili Leste, Aleixo Cobra, atu aprezenta ka hatoo keixa ba tribunal wainhira senti sai vitima husi intervensaun, husi militar foin lalais nee iha Kongresu Estraordinariu Federasaun Futebol Timor Leste, iha Hotel Novu Turizmu.
“Karik ita boot senti sai vitima tanba hasoru agresaun fizika ruma iha Kongresu Estraordinariu liu ba bele halo keixa ba parte justisa, no ami prontu sai sasin hodi defende Prezidente Interinu FFTL, Tenente Jeneral Sr. Falur Rate Laek iha kualker momentu no iha neebe deit,” hatete Prezidente Assosiasaun Arbitrajem Futebol Timor Leste, Nívio da Costa Fernandes, iha Salaun FFTL, segunda nee (28/10/2024).
Nia dehan, prezensa militar ho PNTL iha kongresu nee atu asegura kongresu wainhira iha ema balun tenta atu kria problema iha kongresu nee.
“Sira ba atu asegura, imi hotu-hotu asiste, se karik maun balu senti liman tohar, diak liu lori ba doutor sira halo fisum lori mai para ita haree, hakarak buat uma los nee tenki liu husi fisum mak bele justifika tohar duni ga lae, keta ligadura falun deit karik se mak hatene, hau hanoin nee trip lama tanba uluk ita hasoru Indonezia ita uza hela ida nee,” dehan nia.
Iha biban nee, membru Assosiasaun Futebol hamutuk 13 nee mos husu Prezidente Asosiasaun Futebol Dili Leste, Aleixo Cobra atu respeita Prezidente Interinu FFTL, Tenente Jeneral, Falur Rate Laek.
“Ami husu Prezidente Assosiasaun Futebol Dili Leste, Aleixo Cobra, atu respeita no labele halo atake pesoal neebe laiha relasaun ho atividade futebol hodi aproveita media sosial facebook para tenta harahun imajen Prezidente Interinu FFTL, Tenente Jeneral, Falur Rate Laek nian iha publiku liu husi desfama no insulta, nee hahalok ida neebe imoral (la edukativu) no hamonu dignidade kultural nasaun nian,” hatete Nivio.
Nia hatutan, ema hotu-hotu tenki respeita Tenente Jeneral Falur Rate Laek tanba nia mos nuudar lider rezistensia ida iha prosesu luta libertasaun nasional ba povu no rai doben RDTL.
Entretantu membru Federasaun Futebol Timor Leste (FFTL) husi Assosiasaun Futeból Munisipais no Profisionais hamutuk sanulu resin tolu (13) kompostu husi Assosiasaun Futeból Bobonaro, Assosiasaun Futeból Baukau, Assosiasaun Futeból Lautem, Assosiasaun Futeból Likisá, Assosiasaun Futeból Dili Oeste, Assosiasaun Futeból Remalau Ainaro, Assosiasaun Futebol Oekusi, Assosiasaun Futebol Vikeke, Assosiasaun Futeból Árbitrajen Timor Leste, Assosiasaun Futebol Feminino, Assosiasaun Futebol Juvenil, Assosiasaun Futebol Salaun (FUTSAL) no klubu kampiaun Primeira Divizaun Karketu Dili FC.
(alb)
