DILI, STLTIMORLESTE.com – Prezidente Komisaun F neebe Trata Asuntu Saude Seguransa Sosial no Igualidade Jeneru iha Parlamentu Nasional (PN), Deputada Maria Bareto husu Ministeriu Saude no Ministeriu Agrikultura Peska Pekuaria no Floresta atu halo vizilansia makaas hodi prevene moras raiva labele daet too iha kapital Dili.
Kestaun nee Prezidente Komisaun F levanta liu husi Plenaria iha Parlamentu Nasional (PN), Segunda (07/07/2025)
“Excelência Vise Ministru, ita hotu akompanha iha media moras raiva nee agora tama ona iha Munisipiu Aileu no akontese ema mate iha neeba, no tuir informasaun neebe hau simu katak asu 12 neebe sofre moras raiva halai lakon, signifika halai lakon no la konsege oho,” hatete Deputada Maria Bareto.
Nia hatutan, Ministeriu Saude no Ministeriu Agrikultura liu husi ekipa vizilansia atu halo kontrolu makaas ba asu neebe halai lakon iha ona Munisipiu Aileu, tanba bele daet to kapital Dili.
“Hau nia preokupasaun mak nee, asu 12 neebe halai lakon nee bele daet mai tpo iha Munisipiu Dili. Se tama ona mai iha Dili mak bele akontese moras raiva barak iha nee,” dehan nia.
Nia mos sujere ba ekipa vizilansia ba moras raiva nian atu labele vasina demais ba animal sira, maibe atu halao vizilansia mos ba asu neebe nain la kesi iha uma no lao sai livre dalan ninin no tama sai uma nee diak liu oho tia, duke husik hela, tanba asu nia vida nee la hanesan ema nia vida ida.
“Hau nia rekomendasaun ba iha governu atu foti desizaun ida neebe mak rigorozu oho tia asu neebe kesi iha uma, duke nia lao livre no fo ameasa ba surtu boot ida neebe mak akontese iha Timor laran,” adianta nia.
(alb)
