DILI, STLTIMORLESTE.com – Oras nee daudaun atendimentu pasaporte lao normal, no kada loron ida bele atende ema hamutuk 70 husi sira neebe online no mos sira neebe la online.
Diretor Servisu Rejistu Notariadu, Agustinho Gonsalves Viera hatete, atendimentu pasaporte lao normal, inklui iha munisipiu sira.
“Atendimentu pasaporte lao normal hela, makina sira neebe antes nee mosu hela falhansu agora normaliza hotu ona, atendimentu lao normal,” dehan Viera ba STL iha nia knaar fatin Mandarin, Dili, Tersa (07/01/2024).
Nia hatutan, atendimentu online lao nafatin tuir loron neebe aplikante sira rejista online, maibe ba sira neebe la rejista online trata urjente sira nafatin atende.
Maibe kaderneta pasaporte foun balu tama ona iha semana kotuk, hamutuk rihun neen nulu resin hitu, atu kontinua fasilita sidadaun sira neebe mak hakarak tarata pasaporte hodi viajen ba rai liur.
Iha fatin ketak, Akademiku Universidade Nasional Timorlorosae (UNTL), Rafael de Jesus dehan, atendimentu pasaporte tenke lao normal, tanba ohin loron ema barak mak sai ba rai liur hodi buka moris.
“Importante atendimentu pasaporte tenke lao normal, atu nunee labele akontese fali hanesan uluk, ohin loron ema barak mak viajen ba rai liur sira presiza tarata pasaporte,” dehan nia.
(ter)
