DILI, STLTIMORLESTE.com – Oras nee daudaun atendimentu pasaporte kontinua lao normal, no atende ba sira neebe liu husi sistema online, inklui mos balu neebe la liu husi sistema online.
Haktuir Diretor Rejistu Notariadu, Agustinho Gonsalves Viera ba STL iha Kolmera, Kuarta nee (12/02/2025).
“Atendimentu kona-ba pasaporte kontinua lao normal, kada loron ida bele atende ema husi 200 too 300, “dehan nia.
Nia hatutan, stok kaderneta pasaporte sufisiente hela, no bele garante too iha Dezembru tinan ida nee, no agora daudaun aumenta ona proposta foun hodi halo preparasaun.
Nia esplika, ajendamentu ba online oras nee daudaun lao normal hela, maibe la taka dalan ba sira neebe hatoo pedidu, no sira neebe la iha konhesimentu ba online, iha difikuldade kona-ba telefone sei atende sira.
Iha fatin hanesan, Akademiku Universidade Nasional Timor Lorosae (UNTL), Rafael de Jesus dehan, atendimentu pasaporte tenke lao tuir regra neebe iha, liu-liu lao tuir ajendamentu neebe iha ona.
“Atendimentu tenke lao tuir sistema neebe iha ona, atu labele akontese hanesan tempu uluk, ema ba dader sedu hein hodi tarata,” nia tenik.
Nia hatutan, maneira ida nee diak ona halo ema la dudu malu no la ba dader sedu, tanba nee kontinua mantein ho maneira nee ba iha futuru.
Aleinde nee presiza mos iha planu diak atu prepara kaderneta pasaporte atu stok hotu bele kontinua aumenta, labele halo too iha ikus kaderneta hotu foin buka dalan atu planu.
Nia mos sujere atu funsionariu sira neebe halao servisu iha laran, atu servisu ho profisional tarata ema hotu tuir sira nia ajenda neebe rejistu ona atu labele prejudika sira.
(ter)
