DILI, STLTIMORLESTE.com – Daudaun atendimentu ba pasiente iha Sala Emerjensia Hospital Nasional Guido Valadares (HNGV) kontinua lao diak hanesan loron baibain.
“Ita nia atendimentu saude ba ita nia pasiente sira baixa iha sala emerjénsia lao diak hanesan baibain,” hatete Xefe Departamentu Emerjensia HNGV, Julia Rodrigues ba jornalista sira iha nia knaar fatin Emerjensia HNGV, Kuarta (21/05/2025).
Nia dehan, pasiente neebe tama mai iha sala Emerjensia barak liu mai husi munisípiu, hanesan inan isin rua, nomos asidente, inklui mos pasiente moras baibain.
“Primeiru ita nia mediku sira halo atendimentu lai, depois balun ita evakua ba laran baixa iha bedah laki no bedah wanita, hanesan pasiente neebe hetan kanek todan nee baixa iha ICU, balun ita haruka baixa iha sala emerjénsia too alta,” nia esplika.
Iha fatin hanesan, pasiente Maria Pereira deklara, atendimentu iha sala emerjensia diak tebes, no kona-ba atendimentu ba pasiente hotu-hotu hanesan.
“Ita haree atendimentu ba pasiente hanesan hotu, maibe mediku kuandu pasiente sira neebe mai ho kondisaun grave sira sempre fo atendimentu uluk ida nee depois mak sira seluk neebe kondisaun sei bele tur no koalia,” nia afirma.
(jen)
