DILI, STLTIMORLESTE.com – Atendimentu husi pesoal saude sira bá pasiente moras dengue neebe transfere ba iha Karantina Tasi-Tolu diak no kapas tebes.
Inan husi Pasiente Jefri da Costa Carvalho, ho tinan 10 husi Tibar, Fransisca dos Santos hatete, atendimentu husi doutor no infermeiru sira iha fatin nee diak no kapas tebes.
Nia haktuir, nia oan moras isin manas iha Sesta kalan, tanba klinika iha Tibar Sabadu no Domingu la loke, entaun Segunda mak foin lori nia oan mai konsulta iha Klinika Isamek Tibar, maibe hasai raan nian laiha hodi nunee lori liu kedas mai konsulta iha Sentru Saude Komoro hodi hasai raan no rezultadu pozitivu dengue, entaun loron nee kedas kareta ambulansia tula mai baixa iha Karantina, Tasi-Tolu.
Nia hatete, iha loron nee kareta ambulansia tula pasiente ka labarik sira neebe pozitivu dengue nee nain 3 dala ida no balun too nain 5 hodi lori mai baixa iha nee.
“Hau nia oan mai baixa iha nee ohin tama bá loron 4 ona. Nia isin manas makaas mak iha kalan rua Segunda ho Tersa, horiseik ho ohin tun oituan ona, maibe nia isin mak fraku tanba vontade han no hemu mak laiha. Agora isin manas tun ona, maibe nia senti kolen hela deit. Hau bolu nia atu lao halimar ba liur mais nia lakohi no nia dehan isin kolen no hakarak toba deit,” dehan nia ba STL iha sala baixa Karantina Tasi-Tolu, Kinta (12/02/2026).
Nia dehan, mediku no infermeira sira iha nee hahu husi loron baixa too ohin, sira hotu halo atendimentu diak no kapas loos. La too oras sira mai koko fila fila, fo aimoruk no kontrola hela deit labarik oan sira neebe baixa iha nee. Sira hotu mai koalia ho lian mamar bá pasiente nomos bá familia pasiente hodi husu tuir kondisaun labarik sira nian.
“Baixa fatin iha nee diak los no luan, pesoal saude sira nia atendimentu mos mesak diak deit, halo ita senti familiar los, tanba sira mos hakarak labarik sira nee atu diak. Hau nia oan ohin doutor mai haree dehan aban ou bainrua hanesan nee bele alta ona, hein too nia vontade han iha lai mak foin bele alta, atu nunee too iha uma labele halo inan aman kolen,” tenik Asika.
Nia hatutan, labarik sira mai baixa iha nee barak loos, loron-loron ambulansia tula hela deit mai, balun alta tiha, balun mai baixa fali.
Entretantu tuir observasaun STL iha dader tuku 10 resin iha areador fatin refere kareta ambulansia multi funsaun ho numeru plat 06.669 plat G TL tula pasiente hamutuk nain 3 neebe transfere husi sentru saude sira iha Dili laran mai Karantina Tasi-Tolu. Bainhira atu hakat bá sala baixa nian, kondutor loke fodik odamatan kareta bá familia pasiente no pesoal saude sira neebe akompanha iha ambulansia hodi hatun hela pasiente bá iha sala baixa nian. Bá pasiente sira neebe lao la diak, entaun inan aman no pesoal saude sira kous deit hodi tama too sala baixa. Pasiente sira mai ho kondisaun uza hotu soru iha liman no maioria pasiente sira nee labarik hotu.
Entretantu kona-ba kama neebe iha sala baixa laran balun mamuk daudaun ona, tanba pasiente barak mak alta no rekupera hikas ona, no atendimentu husi pesoal saude sira diak hotu, tanba sira sempre mai haree pasiente hodi koko, fo hemu aimoruk, kontrola no husu tuir kondisaun bá familia pasiente sira ho lian mamar no oin midar.
Pasiente sira neebe mediku dehan bele fila ka alta ona, sira nia familia liu-liu aman inan senti kontenti tanba moras nee diak ona no bele fila hikas fali bá sira uma. Bá sira neebe seidauk bele alta, tanba sei presiza tan tratamentu no kontrola husi pesoal saude sira, nafatin hakmatek iha kama baixa hodi halo tratamentu too diak mak foin bele alta.
(dom)
