DILI, STLTIMORLESTE.com — Komunidade Hudilaran merese atu dehan “Adeuz Hudi Laran, Benvindu Dezenvolvimentu” tanba Hudi Laran ida uluk iha tempu kolonial português no Indonezia termina ona, agora hakat ba dezenvolvimentu ho atividade ekonomia neebe lao makaas tebes iha faze ukun aan.
Tuir Graciana Xavier, Hudilaran uluk laos naran deit, maibe faktus, atu asesu ba hudilaran so liu husi dalan klot sira, laiha estrada no laiha transporte, kuandu povu presiza buat ruma, tenke sai ba Bairru Pite foin bele hetan transporte.
Maibe husi hudilaran mak produs hudi bar barak lori ba merkadu, povu iha iha hudilaran maioria agrikultor hudi no laiha produtu seluk.
“Uluk tempu portuges sei bele halo toos no natar, mas kuandu bee too, tanba nee mak komunidade kuda deit hudi. Iha tempu okupasaun hudi folin diak, lao hudi deit, hudi tahan mos ema sosa hotu, mas agora hela ba naran ka memoria, hudilaran nakfila ba cina laran, uma uma barak, hudi hun ida deit mos lahetan ona,” dehan Graciana.
Nia informa katak iha tempu okupasaun area Hudilaran tama iha linha risku ba seguransa, ema neebe hela iha area nee tenke hetan autorizasaun husi seguransa Indonezia ho karta nee dehan skep 40, ema neebe hela iha Hudilaran bele sura ho liman fuan, nee inisiu kuandu tropas Indonezia tama mai no domina ona Timor, mas gradualmente komesa mamar, ema komesa tama mai okupa oituan halo uma, kuandu tama iha 1990 ema barak ona mak hela iha Hudi laran.
Graciana hatutan, hudilaran komesa iha mudansa kuandu iha 1994 governador Abilio Osorio Soares komesa loke estrada tama mai iha area Hudilaran, hodi kore komunidade hudilaran husi izolamentu no risku ba seguransa.
“Hudilaran iha mudansa nee tanba estrada neebe inisia husi gubernudor Abilio saudozu, nee ami agradese, se lae ami so lao ain deit, sosa foos iha loja sira iha sidade, ho kareta mai para deit iha bairopite, hulan deit too iha uma,” konta Graciana.
Nia dehan Hudilaran iha mudansa boot depois ukun aan, china sira mai komesa loke loja bar-barak hanesan loja ba material konstrusaun, loja ba nesesidade uma laran, loja faan kareta no motor no atividade sira seluk promove atividade atividade ekonomia sira seluk iha area Hudilaran.
“Ita hare loron china sira loke loja konstrusaunian nee, loja ba sembako, loja ropa nian, loja sasan sapur no sira seluk, kalan loke atividade divertimentu oin oin, jogu, kumu isin, alen nee kalan iha mos mini resto sira nee halo Hudilaran sai rame hela deit,” nia komenta.
Nunee mos Narcisio Lopes konsidera Hudilaran agora sai tiha sentru ba ekonomia, uluk ema hotu ba hobur kolmera, agora lae, china domina tiha atividade ekonomia, estrada boot sira nakonu ho atividade komersiu, komunidade lapresiza lao dook hodi sosa sira nia presiza.
“Ida nee mak faktus, nee mak ita dehan dezenvolvmentu, no dezenvolvimentu neebe mak hein mak nee, se ita hein deit governu, dalaruma hudilaran sei nafatin hela iha tinan 20 liuba, maibe agora buat hotu muda, ita mos aproveita hadia moris, liuhusi mudansa sira nee,” relata Narcisio.
Nia lembra katak Hudilaran uluk hanesan armajen ba kriminal, tanba kampu servisu laiha, joven laiha skiil atu tama iha merkadu servisu, barak mak halao atividade kriminal hanesan naok, baku malu, no seluk seluk tan. Mas agora ema ida rua mka sei moris ho atividade nee liu liu joven neebe barukten servisu, maioria joven integra an iha mudansa neebe akontese. Balu servisu, balu forma ona familia, no kontribui ona redus krime iha area Hudilaran.
“Iha 2006, joven sira barak mak envolve krime, polisia kaer, baku, agora sira hotu iha servisu, la envolve ona iha krime, nee mudansa pozitivu husi dezenvomentu neebe lao iha area Hudilaran,” argumenta Narcisio.
(god)
