DILI, STLTIMORLESTE.com – Atleta Kempo Timor Leste sei preokupa ho fasilidade ka infraestrutura hodi fo treinu ba atleta sira.
Kestaun nee hatoo husi Visi Prezidente Shorijin Kempo Timor Leste, Francisco Amaral da Silva ba jornalista sira iha Palasiu Prezidensial, Nicolau Lobato, Bairo Pite, Dili, Tersa (15/04/2025).
“Preokupasaun neebe atleta sira hasoru mak ho situasaun Timor neebe agora daudaun arte marsiais barak dala ruma ami fo treinu ba sira maibe sira labele fila kalan boot tanba deit situasaun ida nee, depois segundu tanba kondisaun fasilidade ou infraestrutura neebe oras nee daudaun ita nia Governu prepara hela seidauk masimu no seidauk diak, oinsa ita utilliza ho diak atu kapasita no eleva ita nia juventude sira neebe iha talentu ba desportu nia, prepara didiak, nunee bainhira kompete iha nivel internasional bele hetan prosesaun neebe diak lori Estadu TL nia naran,” katak Visi Prezidente nee.
Nia hatete, preokupasaun neebe sira hasoru hatoo ona ba iha Ministru Juventude no Desportu neebe reprezenta estadu nia hanesan membru Governu, nunee oinsa bele fasilita no aselera prosesu neebe agora daudaun, liu liu estadiu munisipiu nia atu bele utiliza fo treinu.
“Nunee bele kapasita no fo treinu ba ita nia joven sira ho diak para depois nunee sira mos preparadu hodi kompete iha kompetisaun saida deit iha nivel nasional, rejional no internasional tuir kalendariu kempo planea no husi mundial plenea,” katak Francisco.
Aleinde nee nia hatutan, kempo hahu kedas 2007 hetan ona medalha osan mean, mezmu ke iha tempu neeba halo eksivisaun Tailandia depois 2011 Sea Games iha Jakarta Kalimantan, iha neeba mos hetan medalha osan mean ida, 2013 mos oferense tan medalha osan mean rua ba Estadu TL kompetisaun neebe halao iha Mianmar.
Sira nia tarjetu agora sira prepara hela, no ba Federasaun Kempo sempre prepara iha momentu neebe deit, nunee momentu neebe partisipa iha eventu internasional no rejional kempo sempre prontu. Enkuatu kempo prepara aan hela atu kompete tan iha kompetisaun internasional ida neebe sei realiza iha fulan Agostu 2025.
Nia hatete, daudaun nee sira prepara aan hela no introdus ona ba Ministru Juventude no Desportu nunee bele fo suporta ba Federasaun Kempo hodi bele kompete ho diak, nunee bele reprezenta naran Timor Leste iha Indonezia Bali iha 2025.
(eme)
