DILI, STLTIMORLESTE.com – Federasaun Atletizmu no Karatedo Timor Leste kontinua prepara atleta sira ho klase kategoria junior, hodi kompete iha Jogu CPLP neebe mak Timor Leste sei sai uma nain iha tinan oin.
Prezidente Atletizmu, Afrânio Xavier Amaral hatete, preparasaun atletizmu ba jogu CPLP governu mak lidera, neebe hein deit reuniaun, maibe seidauk prepara mak atleta sira deit.
“Janeiru no Febreiru komesa hahu ona ho altleta sira nia preparasaun, no hetan selesionadu husi feto lima no mane lima, depois sei halo selesaun tan hodi haree ho problema idade balun la tama no balun tama sei halo fali jogus ida,” dehan nia ba STL liu husi telefone, Kinta (26/11/2024).
Nia dehan, iha meius hanesan nee bele partisipa husi munisipiu hotu, bele hetan atleta sira neebe mak atu ba jogu iha CPLP, no sei realiza kampionatu nasional ida para atu hili atleta sira.
Nia afirma, kriteria ba atleta sira tenki ho idade moris husi 2005, no sira sei halai iha klase 1500 inklui lansamentu peisu.
Nia informa, preparasaun ba atleta sira agora sei iha difikuldade, liu-liu iha parte hahan no ekipamentus trenu.
Iha sorin seluk, Sekretariu Jeral Federasaun Karatedo Timor Leste, Antônio Carlos hatete, atividade karate lao hela no sei prepara hela jogu ba CPLP. Neebe foin daudaun enkontru hela iha ministeriu, prepara hela atleta ba jogu CPLP nian.
(mar)
