BAUKAU, STLTIMORLESTE.com – Padre Parokia Santo António Vila Antiga Baukau, Padre Manuel da Silva Ximenes, SDB hateten, atu hetan grasa foun husi Maromak iha festa paskua nee, sarani idak-idak tenke prepara fuan ho moos.
Mensajen nee Padre Parokia Santo António Vila Antiga Baukau, Padre Manuel da Silva Ximenes, SDB tatoli ba sarani Katolika sira iha territoriu nasional liu husi STL iha Vila Antiga Baukau, Tersa (31/03/2026).
Nia hateten, selebrasaun festa paskua mak festa importante ida ba sarani Katolika sira iha mundu inklui sarani Katolika sira iha Timor Leste, tanba nee sarani ida idak tenke konsiente aan nuudar ema sarani Katolika liu husi kontribui pas no estabilidade iha selebrasaun refere.
“Selebrasaun paskua nee atu lao ho diak no hakmatek ita tenke partisipa, ita labele partisipa iha laran hanoin negativu, maibe partisipa misa tenke ho fuan laran moos atu nunee festa ida nee bele fo grasa ba ita,” hateten Pé. Manuel.
Nia rekonhese, grasa husi Maromak ba sarani ida laiha ema atu haree, maibe bele sente liu husi sarani ida nia haksolok neebe ho fuan hakmatek nakonu ho domin, tanba nee bainhira sarani ida hetan grasa husi Maromak sei hatudu ba nia parentes sira ho hahalok haraik aan, simplisidade, nakonu ho domin.
Nia sublina, grasa husi Maromak milagre, maibe ita bele sente no haree liu husi sarani ida nia hahalok, sarani neebe moris nunka haksolok la hetan grasa lo-loos ho nakonu husi Maromak, mak sarani ida neebe moris nakonu odiu vigansa laiha pasiensia no perdua malu.
Tanba nee, iha selebrasaun festa paskua sarani sira presiza hamamuk fuan husi odiu vigansa sira neebe antes nee rai ba malu, nunee bele hetan grasa nakonu husi Maromak leten aas ba.
“Hau fo ezemplu, se hakarak dada bee ba natar bee husi bee matan hotu-hotu konsentra iha natar, maibe la hamoos bee dalan ho diak bee suli sai iha dalan too natar laran bee oituan deit, hanesan mos grasa, se o nia fuan laran nee la moos nakonu ho odiu vigansa entaun grasa neebe mai nee oituan deit, se o hakarak hetan grasa neebe nakonu o nia fuan tenke moos,” Pe.Manuel akresenta.
Aleinde nee Padre Parokia mos husu joven sarani Katolika sira atu labele lori pesoal no grupu ba iha selebrasaun festa paskua nian, hodi aproveita tempu misa remata halo problema perturba ordem publiku. Tanba nee husu sarani jovem sira koko atu kompriende aan nuudar ema sarani Katolika hatudu hahalok diak.
Tanba tuir Santo Padre Francisco nia hanorin, Jovem mak mina morin ba ema seluk nia moris hodi ema seluk labele despreza jovem sira iha Timor.
“Hau husu imi foinsae sira hatene imi nia identidade nuudar kristaun Katolika neebe tenke lori domin, domin no haksolok ba imi nia aan ba imi mia familia no ba sosiedade tomak,” Pe. Manuel enkoraja.
Entretantu mensajen importante neebe sei koalia iha selebrasaun misa kinta feira santa semana nee mak “Imi tenke hadomi malu nuudar hau hadomi imi, domin neebe hau fo ba imi too hau saran aan mate iha kruz,” dehan amu.
(tom)
