DILI, STLTIMORLESTE.com – Bainhira atu hetan osan konsesaun eskolar, primeiru lideransa husi eskola tenke halo planu tuir nesesidade eskola nian.
Koordenadora EBF Vila Verde, Filomena Casmira hatoo lia hirak nee ba jornalista STL iha nia knaar fatin Vila Verde, Kuarta nee (25/06/2025).
“Konsesaun nee ami simu tuir total estudantes neebe mak ami iha, maibe bainhira atu hetan osan ida nee, lideransa ou nuudar Koordenadora tenke halo planu tuir nesesidade eskola nian, osan nee tama ona no ami sosa daudaun ona sasan, tanba orientasaun neebe mak ami nian lideransa sira hatoo katak, bainhira sira too ona iha nee mak sasan neebe sosa ona nee lori tama mai, tanba sira mak sei halo kontrolu ba ida nee,” dehan nia.
Nia dehan, kada estudantes US$ 2, no osan ida nee bazeia ba numeru estudantes neebe mak ohin mensiona, nee duni osan ida nee uza tuir nesesidade eskola nian neebe mak iha, maibe daudaun nee hahu uza ona osan nee hodi ba sosa sasan tuir nesesidade eskola nian.
Iha parte seluk, Diretor EBC 10 Dezembru Komoro, Calistro A. Guterres hatete, konsesaun nee ezekuta tuir trimestral ninia, konsesaun nee hamutuk US$ 2.432, maibe tanba fahe ba eskola haat, entaun Ensinu Baziku Sentral hetan deit rihun US$ 5 tanba bazeia ba estudantes, kada estudantes US$ 2.
“Kona-ba konsesoins eskolar ami simu ona iha Segunda semana liu ba, agora tama ona iha faze kompras ka ezekusaun, bainhira kompras nee hotu bele kompleta ona dibidas neebe iha ezame primeiru periodu ninia, tanba ita atu hetan osan ida nee, primeiru aprezenta planu asaun eskolar, planu nee ba tinan 1 nian, maibe utilizasaun ba trimestral,” esplika Diretor EBC Dezembru Komoro, Calistro A. Guterres ba jornalista STL iha nia knaar fatin Komoro, Kuarta nee (18/06/2025).
Entretantu Diretor EBC Manleuana, Carlos Correia hatete, konsesoins eskolar nee sai, sei uza tuir nesesidade eskola nian, tanba durante nee iha ezame primeiru periodu nee eskola sei deve hela rental hodi foto kopia materia iha ezame primeiru periodu ninia.
“Ami nian konsesoins eskolar nee sai sei uza tuir nesesidade eskola nian, tanba durante nee iha ezame primeiru periodu nee eskola sei deve hela rental hodi foto kopia materia iha ezame primeiru periodu ninia,” dehan nia.
Nia hatutan, osan konsesaun eskolar nee sei uza ba iha nesesidade eskola nian no osan ida nee bazeia ba numeru estudantes neebe mak iha eskola ida nee, kada estudantes US$ 2, sira nian relatoriu 2024 hamata kleur ona.
(jac)
