DILI, STLTIMORLESTE.com – Jurista Timoroan Jose Maria Guterres deklara katak, publiku kestiona ho kazu pendente iha Tribunal, tanba nee tenke aumenta numeru rekursu umanus hodi redus kazu pendente.
“Importante atu redus kazu pendente, tanba ohin loron prosesu balu tama iha Tribunal kleur ona, maibe Tribunal seidauk julga no kontinua pendente,” ehan Nia ba STL iha Kaikoli, Sesta (30/05/2025).
Nia hatutan, atu redus kazu pendente, primeiru tenke iha numeru rekursu umanus neebe sufisiente, no segundu tenke jere rekursu hirak nee ho diak hodi halo redusaun ba prosesu pendente.
Jurista nee informa, ohin loron ema barak buka justisa, tanba nee justisa mos tenke lao lais atu sira sente katak justisa iha duni ba sira.
Iha fatin ketak, Prezidente Asosiasaun Majislatura Judisial, Antonino Gonsalves dehan, oras nee daudaun formandu balu halao hela formasaun iha Portugal, sira pasa iha formasaun fila mai bele halao estajiu iha Tribunal hodi apoiu servisu Tribunal nian.
“Formandus husi Juiz nian nain sanulu resin tolu halao hela formasaun iha Portugal, espera sira bele pasa atu fila mai sai Juiz estajiadu atu apoiu servisu iha Tribunal,” dehan nia.
Hatutan, kazu pendente kauza mos husi numeru rekursu umanus menus, tanba nee presiza duni rekursu umanus atu reforsa servisu Tribunal nian.
(ter)
