DILI, STLTIMORLESTE.com – Forsa Defeza Australia apoia botas militar ba FALINTIL – Forsa Defeza Timor Leste (F-FDTL) atu uza ba servisu militar.
Xefe Estadu Maior Jeneral FALINTIL – Forsa Defeza Timor Leste, Tenente Jeneral, Domingos Raul “Falur Rate Laek” agradese ba apoiu neebe Australia fo ba F-FDTL.
“Ohin ita mai iha nee asiste momentu istoriku dala ida tan hodi apoiu neebe forsa Australia entrega mai ita. Ohin ita simu tan botas husi ita nia parseiru Australia. Botas sira nee serve duni ba sira membru F-FDTL atu uza, apoiu ida nee iha signifikadu boot entre Timor Leste ho Australia nia relasaun iha neebe atu hametin relasaun entre nasaun rua”, dehan Tenente Jeneral, Domingos Raul “Falur Rate Laek” ba jornalista sira iha Sentru Instrusaun Komamdante, Nicolau Lobato (CICLN), Metinaro, Kinta (23/1/2025).
Tenente Jeneral, Domingos Raul “Falur Rate Laek”, hatutan, Australia nuudar parseria Estratejiku ida ba Timor Leste, tan nee husu Australia kontinua apoia F-FDTL, nunee hamutuk kombate ameasa sira.
“Imi presiza kontinua halo kooperasaun militar iha Timor Leste atu prevene ameasa sira, hanesan nasaun vizinhu tenke apoia malu nafatin hodi prevene ameasa sira”, nia esplika.
Falur mos agradese ba apoia Governu Australia durante nee no Australia nuudar parseiru estratejiku ba Timor Leste.” Ita la haluhan Australia nia apoiu durante Australia fo mai, durante dezenvolvimentu Forsa Defeza hahu husi Aileu mai Metinaro too ohin loron sira sempre akompanha ita nia dezenvolvimentu Forsa nian”, nia deklara.
Iha fatin hanesan, Adidu Defeza Australia, Kapitaun Mar e Gerra Matthew Richardson esplika, ondra boot ba nia reprezenta Governu Australia hodi entrega Botas ba Forsa Armada Timor Leste.
“Ohin ita mai iha Sentru Instrusaun Metinaro hodi entrega apoia neebe Forsa Armada Australia fo ba Forsa Defeza Timor Leste”, dehan nia.
Nia sublina, botas neebe Australia apoia nee nuudar botas ho kualidade neebe diak tebes, neebe Forsa Australia mane no feto uza ba servisu no ezersisiu.
(jen)
