DILI, STLTIMORLESTE.com – Daudaun nee Australia liu husi Timor Leste Police Development Programme (TLPDP) apoiu Polísia Nasionál Timor-Leste (PNTL) halao teste ba kazu kilat musan, neebe durante nee akontese iha kapital Díli liu husi ema deskonhesidu.
Komandante Operasaun Servisu Investigasaun Kriminal, Inspetor Xefi Mozinho Coreia hatete, teste neebe Australia apoiu nee ba kazu tolu hanesan, primeiru iha tinan 2018 ema deskonhesidu tiru iha Eis Prezidente Republika, Francisco Guterres Lú Olo nia uma, segundu iha komunidade ida iha Matadoru nia uma, iha tinan 2024 no terseiru foin lalais nee akontese tan iha Eis Prezidente Republika, Francisco Guterres Lú Olo nia rezidensia.
“Australia liu husi Timor Leste Police Development Programme (TLPDP) apoiu ita halo teste ba kilat musan sira nee, ho objetivu atu hatene kona-ba tipu arma saida mak utiliza hodi tiru, nunee mos hodi hatene katak se mak tiru,” hatete Inspetor Xefi Mozinho Coreia ba jornalista sira, iha Komando Jeral PNTL, Kaikoli, Dili, Sesta (17/01/2025).
Nia informa, kona-ba rezultadu teste husi laboratoriu ba teste nee la iha duvida, tanba laboratoriu neebe mak diak tebes iha rejiaun nee.
“Rezultadu saida deit ita la iha duvida, tanba laboratoriu nee kualidade iha internasional,” nia hatutan.
Nia deklara, total kilat musan nee mak hodi halo teste iha evidensia 3 no sampel referensia 11 hamutuk kilat musan 14 mak utiliza hodi halo teste, nunee mos foti arma lima (5) husi Unidade Espesial Polísia (UEP) hodi halo komparasaun.
Entretantu Peritu Palastik Australia iha Timor Leste, Matthew Bolton dehan, teste ba kilat musan nee nia durasaun kuaze semana haat (4) hodi halo komparasaun. “Ita hein deit rezultadu husi komparasaun nee,” nia saliente.
(jen)
