DILI, STLTIMORLESTE.com – Prezidente Republika (PR), Jose Ramos Horta hatete, tempu difisil Australia sempre hamriik iha Timor Leste nia sorin hahu husi luta ba ukun rasik aan too harii nasaun.
Prezidente Republika Jose Ramos Horta hatoo kestaun nee liu husi diskursu bainhira loke abertura komferensia Ekonomika no Emprezarial Timor Leste – Australia 2025 ba daruak iha salaun GMN Bebora, Kuarta kalan (06/08/2025).
Prezidente Republika hatete, ho konferensia Ekonimika no Emprezarial Timor Leste no Australia, eventu ida nee sei sai hanesan marku anual ida relasaun bilateral sira. Konferensia Ekonomika no Emprezarial Timor Leste – Australia 2025 laos deit konferensia hanesan ponte ida entre nasaun rua. Hodi hasoru malu hametin ita-niaamizade, aprofunda kooperasaun no harii futuru ida neebe komun ba kreximentu no dezenvolvimentu ekonomiku.
“Australia hamriik iha Timor Leste nia sorin husi ami-nia luta ba ukun rasik-an too ami nia perkursu harii nasaun. Ohin, ami kontinua parseria ida-nee liuhosi komersiu, investimentu, inovasaun no ami nia kompromisu hamutuk ba kreximentu ida sustentavel no inkluzivu,” dehan Prezidente Republika, Jose Ramos Horta.
Prezidente Republika husu ba líder emprezarial no investidor australianu sira neebe prezente iha nee katak Timor Leste nakloke ba investimentu.
“Ami oferese forsa trabalhu ida neebe joven no motivada, vizaun rejional ida neebe habelar no oportunidade atu halo parte iha istoria transformasaun ami nia rain nian. Hau konvida ita-boot sira atu esplora oportunidade barak neebe Timor-Leste oferese no atu halo parseria ho ami hodi harii futuru ida neebe reziliente no prosperu,” katak PR Horta.
Xefe Estadu dehan, atu konferensia ida nee sai espasu ida atu harii relasaun sira, harii akordu sira, no fahe ideia sira neebe lori ba mudansa neebe signifikativa no dura.
Xefe Estadu dezeja ba ema hotu konferensia ida neebe produtiva no inspiradora, no kalan ida neebe furak, halo an hanesan iha uma, goza kalan, liga, fahe no kolabora.
(eme)
